Təhsil naziri Misir Mərdanov sentyabrın 29-da ABŞ-ın Corciya Dövlət Universitetinin prezidenti Mark Beker, universitetin Robinson Biznes Kollecinin dekanı Fenvik Hass və bu ali təhsil ocağının professoru Bijan Fəzlullahi ilə görüşmüşdür.
Təhsil Nazirliyindən verilən məlumata görə, görüşdə dünyanın ən nüfuzlu universitetlərindən olan Corciya Dövlət Universiteti rəhbərliyinin Azərbaycana gəlişini yüksək qiymətləndirən nazir bu səfəri ölkəmizin təhsil tarixində önəmli hadisə adlandırıb.
M.Mərdanov ölkəmizdə ali təhsil sahəsinin inkişafı, ali məktəblərin müxtəlif beynəlxalq proqramlara qoşulması haqqında qonaqlara ətraflı məlumat vermişdir. 20 il öncə Azərbaycanda özəl ali təhsil müəssisəsinin mövcud olmadığını diqqətə çatdıran nazir bildirmişdir ki, bu gün ölkəmizdə 15 özəl universitet fəaliyyət göstərir. Nazir Corciya Dövlət Universiteti ilə Azərbaycan Dövlət Neft Akademiyası, Azərbaycan Universiteti və Odlar Yurdu Universiteti arasında əlaqələrin yaradıldığını bildirmişdir.
Corciya Dövlət Universiteti ilə Azərbaycanın 3 ali təhsil müəssisəsi arasındakı əlaqələrin əhəmiyyətini qeyd edən universitet prezidenti birgə əməkdaşlığın inkişafına və daha böyük nailiyyətlər əldə ediləcəyinə ümidvar olduğunu bildirmiş, Azərbaycan Universiteti ilə əməkdaşlıq çərçivəsində görülən işlərdən bəhs etmişdir. O, Azərbaycan Universitetində birgə reallaşdırılan təhsil proqramları üzrə təhsil alan tələbələrin cari ilin dekabrında məzun olacağını qeyd edərək, bu işi əməkdaşlığın əhəmiyyətli nəticəsi kimi dəyərləndirmişdir.