15 sentyabr - "Bilik Günü" Qaradağ rayonundakı şəhid Etibar Şirəliyev adına 274 nömrəli orta məktəbdə də böyük təntənə ilə qeyd olundu. Bunun bir neçə səbəbi var idi. Belə ki, məktəb son illər Heydər Əliyev Fondunun təşəbbüsü ilə əsaslı şəkildə təmir olunub, maddi-texniki baza möhkəmləndirilib, əmək intizamı, dərsə davamiyyət və təhsilin keyfiyyəti dövlətin tələb etdiyi səviyyədə müasirləşdirilib.
Bunun nəticəsidir ki, artıq müxtəlif qəsəbələrdə və mikrorayonlarda yaşayan bəzi valideynlər öz uşaqlarını oxutmaq üçün paytaxtdan 25 kilometr uzaqda olan bu məktəbə gətirirlər.
"Bilik Günü" münasibəti ilə keçirilən tədbirdə məktəbin direktoru Atakişi Cəfərov qeyd etdi ki, dövlətin, Bakı Şəhəri üzrə Təhsil İdarəsinin və Qaradağ Rayon İcra Hakimiyyəti rəhbərliyinin bizə göstərdiyi qayğıya kollektivimiz böyük uğurlarla cavab verir. Məsələn, 2005-ci ildə məktəbimizin ali məktəblərə sənəd verən məzunlarının 18 faizi tələbə adını qazanmışdı. 2006-cı ildə bu rəqəm 23 faiz olmuşdu. Bu göstərici dinamik olaraq artmış, 2010-cu ildə 44 faiz, bu il isə 57 faiz olmuşdur. Builki məzunlarından ikisi 620-dən çox bal toplamışdır. Məktəbimiz reytinq göstəricisinə görə paytaxt məktəbləri arasında fəxr edilməli yerlərdən birini tutur.
Rayon icra hakimiyyəti aparatının nümayəndəsi Seyfulla Ağayev çıxış edərək Müşfiqabad məktəbinin son illər əldə etdiyi nailiyyətlərin yüksək qiymətləndirildiyini söylədi. İcra başçısının Müşfiqabad qəsəbəsi üzrə ərazi nümayəndəsi Oqtay Sadıqov, qəsəbə bələdiyyəsinin sədri Elman Quliyev, direktor müavini Emiliya Əliyeva, valideynlər və müəllimlər çıxış edərək şagirdləri yeni dərs ilinin başlanması münasibəti ilə təbrik etdilər. 600-dən çox bal toplamış məzunların sinif rəhbərlərinə fəxri fərmanlar təqdim edildi. Yüksək balla tələbə adını qazanmış məzunlardan biri məktəbin rəmzi bilik açarını birinci sinif şagirdlərinə təqdim etdi. Onlar isə yeni dərs ilinin başlandığını bildirən ilk zəngi çaldılar.

İttifaq MİRZƏBƏYLİ, "Xalq qəzeti"