Zaqatala rayonunda Bilik günü ilə əlaqədar Aşağı Çardaxlar kəndində yeni inşa edilən 220 yerlik və Muxax kəndində əsaslı təmir olunan A.Bubuşov adına 1 saylı tam orta məktəblərin açılış mərasimləri keçirilmişdir.
Zaqatala rayon icra hakimiyyətinin başçısı Mübariz Əhmədzadə mərasimdə çıxış edərək Azərbaycan təhsilinin yüksək nailiyyətlər qazanmasında ulu öndərimiz Heydər Əliyevin tarixi xidmətlərindən danışmış, Azərbaycan Respublikasının Prezidenti cənab İlham Əliyevin bütün sahələrə olduğu kimi təhsilə də yüksək diqqət və qayğı göstərdiyini vurğulamış, müəllim kollektivini və şagirdləri yeni dərs ilinin başlanması münasibəti ilə təbrik etmiş, gənc nəslin təlim-tərbiyəsi işində onlara daha böyük uğurlar arzulamışdır. O, çıxışında əldə olunan nailiyyətlərdən danışmış, eyni zamanda yol verilmiş nöqsanlara toxunmuş, onların həlli ilə bağlı konkret tapşırıqlarını vermişdir.
Daha sonra tədbirdə çıxış edən məktəbin müəllim və şagirdləri regionların, o cümlədən Zaqatalanın ən ucqar yaşayış məntəqələrində belə yeni təhsil müəssisələrinin tikintisinə və onların maddi-texniki bazasının möhkəmləndirilməsinə göstərdiyi xüsusi diqqət və qayğıya görə Azərbaycan Respublikasının Prezidenti cənab İlham Əliyevə, Heydər Əliyev Fondunun Prezidenti, YUNESKO və İSESKO-nun xoş məramlı səfiri, Milli Məclisin deputatı Mehriban xanım Əliyevaya dərin təşəkkürlərini bildirmişlər.
Rəmzi qırmızı lent kəsildikdən sonra mərasim iştirakçıları yeni məktəb binası ilə yaxından tanış olmuşlar. Uyğunlaşdırılmış binada yerləşən qəza vəziyyətində olan Aşağı Çardaxlar kənd orta məktəbinin köhnə binası 1972-ci ildə tikilmişdir. Dövlət vəsaiti hesabına müasir standartlara uyğun inşa edilmiş 220 şagird yerlik iki mərtəbəli yeni məktəb binasında isə 11 sinif otağı, fənn kabinetləri, kompyuter otağı, laboratoriya, kitabxana, bufet, həkim məntəqəsi, akt və idman zalları vardır. Məktəbdə müasir istilik sistemi, ayrıca generator quraşdırılmış, buraya yeni su xətti çəkilmişdir. Həyətdə idman meydançası tikilmiş, tamet plitələr və asfalt döşənmiş, yaşıllıq zolağı salınmışdır.
Daha sonra rayon icra hakimiyyətinin başçısı Mübariz Əhmədzadə dövlət vəsaiti hesabına əsaslı təmir olunmuş Muxax 1 saylı orta məktəbinin açılışında iştirak etmişdir.
Hər iki məktəb yeni bərk inventar və avadanlıqlarla təchiz edilmişdir.

İlqar HƏSƏNOV, "Xalq qəzeti"nin bölgə müxbiri