Ölkəmizdə son illər bütün sahələrdə olduğu kimi, təhsildə də böyük inkişaf əldə edilir, təhsilin müasir tələblərə cavab verməsi üçün zəruri tədbirlər həyata keçirilir.
"2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nda həm də yeni təhsil ocaqlarının inşası, mövcud təhsil müəssisələrində yenidənqurma və əsaslı təmir işlərinin aparılması əksini tapmışdır. Proqramda Nəsimi rayonundakı 12 təhsil müəssisəsində əsaslı təmir aparılması, 2 obyektdə isə əlavə korpusların inşası nəzərdə tutulmuşdur. Rayonun 35, 44, 266, 133, 16 və 292 nömrəli orta məktəblərində əsaslı təmir işləri artıq başa çatmışdır. Ölkə Prezidenti İlham Əliyev 35 nömrəli məktəbdə təmir zamanı işin gedişi, 44 nömrəli məktəbdə isə əsaslı təmirdən sonrakı vəziyyətlə tanış olmuşdur.
Sentyabrın 15-də Nəsimi rayonunda əsaslı təmirdən sonra istifadəyə verilmiş 6 məktəbdə təntənəli mərasim keçirilmişdir. Tədbirlərdə çıxış edən rayon icra hakimiyyətinin başçısı Nəsib Məhəməliyev müəllim və şagirdləri Bilik günü münasibətilə təbrik etmiş, yeni tədris ilində onlara uğurlar arzulamışdır. O demişdir ki, ulu öndərimiz Heydər Əliyevin başladığı və ölkəmizdə təhsilin inkişafına yönəlmiş islahatlar bu gün möhtərəm Prezidentimiz İlham Əliyev tərəfindən uğurla davam etdirilir. Son illər bütün sahələrdə olduğu kimi, təhsildə də mühüm nailiyyətlər əldə edilmişdir. Təhsilin müasir infrastrukturunun yaradılması və möhkəmləndirilməsi istiqamətində mühüm addımlar atılır, bu sahədə genişmiqyaslı proqram və layihələr həyata keçirilir. Azərbaycan təhsilinin inkişafında millət vəkili, YUNESKO və İSESKO-nun xoşməramlı səfiri Mehriban xanım Əliyevanın rəhbəri olduğu Heydər Əliyev Fondunun böyük rolu vardır. Fondun təşəbbüsü ilə ölkəmizdə son illər müasir tələblərə cavab verən çoxlu sayda yeni məktəblər inşa edilmiş, mövcud təhsil müəssisələri əsaslı təmir olunmuş və onlar lazımi avdanlıqlarla təchiz edilmişlər.
Son illər Nəsimi rayonunda təhsil sahəsində ciddi uğurlar əldə edildiyini qeyd edən Nəsib Məhəməliyev məktəblərin kollektivlərinə və şagirdlərinə müvəffəqiyyətlər arzuladı.

Ayaz HƏMİDOĞLU, "Xalq qəzeti"