Rayon mərkəzindəki 7 saylı uşaq bağçasının əsaslı təmirdən sonra açılış mərasimi keçirilmişdir. Tədbirdə icra hakimiyyətinin başçısı Mübariz Əhmədzadə, hüquq-mühafizə orqanlarının rəhbərləri və ictimaiyyət nümayəndələri iştirak etmişlər.
Mübariz Əhmədzadə bağçanın balaca sakinlərini, onların valideynlərini əlamətdar hadisə münasibətilə təbrik etmiş, ölkəmizdə uşaqlara göstərilən qayğıdan danışmışdır. Natiq ulu öndərimiz Heydər Əliyevin uşaqlara daim böyük sevgi və məhəbbət bəslədiyini xüsusi vurğulamış, bu siyasəti uğurla davam etdirən Prezident İlham Əliyevin, habelə Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın bilavasitə diqqət və qayğısı sayəsində ölkəmizdə uşaqların sağlamlığının qorunması, təlim-tərbiyəsi və təhsili sahəsində mühüm tədbirlərin həyata keçirildiyini diqqətə çatdırmışdır. Qeyd olunmuşdur ki, bu, cari ildə rayonda əsaslı təmir olunan sayca beşinci uşaq bağçasıdır. Natiq bu istiqamətdə tədbirlərin gələcəkdə də davam etdiriləcəyini, yeni bağçaların tikiləcəyini, köhnələrinin isə əsaslı təmir olunacağını bildirmişdir.
Mərasimdə rayon təhsil şöbəsinin müdiri Habil Qurbanov, bağçanın müdiri Gülzar Teyyubova, valideynlər çıxış edərək uşaqların təlim-tərbiyəsinə göstərilən yüksək diqqət və qayğıya görə dövlətimizin başçısına minnətdarlıqlarını bildirmişlər. Uşaqların hazırladığı bədii proqramdan sonra bağçaya baxış keçirilmişdir. Məlumat verilmişdir ki, 1962-ci ildən bu binada fəaliyyət göstərən uşaq bağçasında əsaslı təmir işlərinə cari ilin aprelində başlanmışdır. Təmir işlərindən sonra buradakı otaqların sayı 14-ə çatdırılmışdır. Müəssisədə 80 uşaq təlim-tərbiyə alır. Dövlət vəsaiti hesabına təmir olunan bağça yeni inventar və avadanlıqla təchiz olunmuş, həyətində abadlıq işləri aparılmışdır.