Görüşdə çıxış edən rayon icra hakimiyyətinin başçısı Mübariz Əhmədzadə tələbə adını qazanmış gəncləri bu şərəfli ada layiq görülmələri münasibəti ilə təbrik etmiş, onlara təhsildə uğurlar arzulamışdır.
Natiq ümummilli liderimiz Heydər Əliyevin hakimiyyətə qayıdışından sonra respublikamızda bütün sahələrdə olduğu kimi təhsil sistemində də geniş islahatlar aparıldığını, hazırda bu siyasətin Azərbaycan Respublikasının Prezidenti İlham Əliyev tərəfindən uğurla davam etdirildiyini qeyd etmiş, bu sahənin inkişafı ilə bağlı ölkə rəhbəri tərəfindən mühüm sərəncamların imzalandığını, təhsilin maddi-texniki bazasının möhkəmləndirilməsi istiqamətində ardıcıl tədbirlərin həyata keçirildiyini vurğulamışdır. Rayon rəhbəri dövlətimizin müəllim əməyinə həmişə yüksək qiymət verdiyini, son illər rayon müəllimlərindən 6 nəfərin "Əməkdar müəllim" fəxri adına, 5 nəfərin "Tərəqqi" medalına, 16 nəfərin isə "Azərbaycan Respublikasının qabaqcıl təhsil işçisi" döş nişanına layiq görüldüyünü bildirmişdir.
Daha sonra rayon rəhbəri qazanılan uğurlardan və qarşıda duran problemlərdən danışmış, onların həlli istiqamətində görüləcək işlərdən geniş söhbət açmışdır.
Tədbirdə çıxış edənlər bu il Zaqatala rayonunda 687 məzunun ali məktəblərə qəbul imtahanlarında iştirak etdiyini, onlardan 275 nəfərinin tələbə adını qazandığını bildirmiş, 33 nəfərin 500-dən, 13 nəfərin 600-dən çox bal topladığını qeyd etmişlər. Natiqlər, respublikamızda təhsilə göstərilən yüksək diqqət və qayğıya görə Azərbaycan Respublikasının Prezidenti İlham Əliyevə və Heydər Əliyev Fondunun Prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevaya öz dərin təşəkkürlərini bildirmişlər.
Tədbirin sonunda 600-dən çox bal toplayan 13 tələbəyə pul mükafatı və xatirə hədiyyələri təqdim edilmişdir.
Görüş konsert proqramı ilə başa çatmışdır.

İlqar HƏSƏNOV, "Xalq qəzeti"nin bölgə müxbiri