Türkiyənin Gülhanə Hərbi Tibb Akademiyasında məzunların buraxılışı mərasimi olmuşdur. Məzunların sırasında iki azərbaycanlı da vardır.  
Tədbirdə Prezident Abdullah Gül, Baş nazir Rəcəb Tayyib Ərdoğan, Türkiyə Böyük Millət Məclisinin sədri Cəmil Çiçək, Silahlı Qüvvələrin Baş Qərargah rəisi, ordu generalı Necdət Özəl və digər rəsmi şəxslər iştirak etmişlər. Azərbaycanlı məzunlara diplomları Türkiyə Hərbi Hava Qüvvələri komandanı, ordu generalı Məhmət Erten təqdim etmişdir.
Buraxılış mərasimində İordaniya, Balkan ölkələri və Mərkəzi Asiya respublikalarından olan məzunlara da diplomlar təqdim olunmuşdur.
Gülhanə Hərbi Tibb Akademiyasının komandanı, general-mayor Koray Akbaş bildirmişdir ki, 113 illik tarixə və zəngin təcrübəyə malik olan bu ali təhsil ocağı ordu üçün peşəkar həkimlər hazırlamaqla yanaşı, tibb elminin müxtəlif sahələri üzrə tədqiqatlar da aparır.

Oqtay BAYRAMOV, AzərTAc-ın xüsusi müxbiri
Ankara