Ölkəmizin hər yerində olduğu kimi, Masallı rayonunda da sosial-iqtisadi inkişaf proqramları ardıcıl həyata keçirilir və bu zəmində təhsil, səhiyyə, mədəniyyət sahələrində də uğurlar qazanılır. Bu il ölkəmizin ali təhsil müəssisələrinə qəbul edilmiş məzunlarla görüşdə bu barədə ətraflı danışılmışdır.
Tədbir iştirakçıları əvvəlcə ulu öndər Heydər Əliyevin abidəsini ziyarət etmiş, önünə gül dəstələri qoymuşlar. Heydər Əliyev muzeyi ilə tanışlıq onlarda xoş təəssürat yaratmışdır.
Tələbələrlə görüşü Masallı Rayon İcra Hakimiyyətinin başçısı Qəzənfər Ağayev açaraq müstəqil Azərbaycan Respublikasında aparılan təhsil islahatları, ümummilli lider Heydər Əliyevin həyata keçirdiyi təhsilin inkişafı konsepsiyası, Prezident İlham Əliyevin təhsilə və təhsil işçilərinə gündəlik diqqət və qayğısı, yeni məktəblərin tikintisi, maddi-texniki bazanın genişləndirilməsi barədə məlumat vermişdir. O demişdir ki, Masallıda da təhsilin inkişafı daim diqqət mərkəzində saxlanılır və bu sahədə ilbəil daha böyük nailiyyətlər qazanılır. Sonra yüksək balla tələbə adını qazanmış rayon məzunlarını təbrik edən icra hakimiyyətinin başçısı onlara ən xoş arzularını bildirmişdir.
Rayon təhsil şöbəsinin müdiri Astan İbişov builki məktəblərə qəbul haqqında məlumat vermişdir. Qeyd olunmuşdur ki, bu il attestat almış 1243 məzundan yarısı TQDK-ya ərizə ilə müraciət etmişdir. İmtahanların ilkin nəticələrinə görə 238 nəfər Masallı məzunu müxtəlif ali məktəblərə daxil olmuşdur. Onlardan 39 nəfəri 500-dən yuxarı, 11 nəfəri isə 600-dən yuxarı bal toplamışdır. Bu da əvvəlki ilin göstəricilərindən xeyli çoxdur. Musaküçə kənd tam orta məktəbinin məzunu Tehran Alışov 665 balla Qafqaz Universitetinin, Köçəkli kənd tam orta məktəbinin məzunu Anar Cəfərov isə 651 balla Bakı Dövlət Universitetinin tələbəsi adına layiq görülmüşlər. Bu nailiyyətlərin qazanılmasında rayon rəhbərliyinin böyük rolunu qeyd edən natiq RİH başçısı tərəfindən yüksək balla tələbə adını qazanmış gənclərə təqaüdlərin verildiyini, təhsil sahəsində hər bir təşəbbüsə güclü dəstək göstərildiyini diqqətə çatdırmış və minnətdarlığını bildirmişdir.
Builki qəbulda Masallı şəhər 1 və 3 saylı məktəblərin, "Dəfinə" liseyinin, Ərkivan qəsəbə 2 və 3 saylı, Şərəfə, Xıl, Hişkədərə, Təzə Alvadı 1 saylı, Həsənli, Xırmandalı, Qızılavar məktəblərinin pedaqoji kollektivləri yüksək nəticələr əldə etmişlər.
Ötən tədris ilinin nəticələrinə görə "Ən yaxşı ümumtəhsil məktəbi" adına layiq görülmüş Masallı şəhər 1 saylı məktəbinin direktoru, "Tərəqqi" medallı Mirqabil Hüseynov, Boradigah qəsəbə 2 saylı məktəbin məzunu, ADU-nun 1-ci kurs tələbəsi Aysel Mirzəzadə, Musaküçə kənd məktəbinin məzunu, Qafqaz Universitetinin 1-ci kurs tələbəsi Tehran Alışov çıxış edərək bu görüşə görə rayon rəhbərliyinə razılıqlarını bildirmişlər. Onlar təhsilə dövlət səviyyəsində göstərilən qayğıdan ruhlanaraq uğurlarını daha da artırma əzmini ifadə etmişlər. Yüksək balla tələbə adını qazanmış məzunlara Masallı RİH-nin fəxri-fərmanları və pul mükafatları təqdim olunmuş və onlarla xatirə şəkilləri çəkdirilmişdir.
Sonra "Dəfinə" liseyində tələbə adına layiq görülmüş gənclərin şərəfinə konsert verilmiş, yüksək bal toplamış məzunlara gənclər və idman idarəsinin qiymətli hədiyyələri, həmçinin təhsil şöbəsinin fəxri-fərmanları təqdim olunmuşdur.

Əli NƏCƏFXANLI, "Xalq qəzeti"