Bu il ali məktəblərə qəbul olunmuş astaralı tələbələrlə rayon icra hakimiyyətində görüş keçirilmişdir. Tədbirdən əvvəl görüş iştirakçıları ulu öndər Heydər Əliyevin abidəsini ziyarət etmiş, önünə əklil və çiçək dəstələri düzmüşlər. 
Rayon icra hakimiyyətinin geniş akt zalında keçirilən tədbiri təhsil şöbəsinin müdiri Qızbəs Məmmədova açaraq, builki ali məktəblərə qəbul haqqında məlumat vermişdir. Qeyd olunmuşdur ki, bu il rayonun ümumtəhsil məktəblərini 1124 şagird bitirmişdir. Məzunlardan 321 nəfəri, əvvəlki illərin məzunlarından isə 271 nəfəri TQDK-ya ərizə ilə müraciət etmişdir. İmtahanların ilkin nəticələrinə görə 143 nəfər astaralı gənc respublikanın müxtəlif ali məktəblərinə daxil olmuşdur. Onlardan 4 nəfəri 600-dən yuxarı, 23 nəfəri 500-dən yuxarı bal toplamışdır. Bu da əvvəlki ilin göstəricisindən 2 dəfə çoxdur. Rayon üzrə ən yüksək nəticə Kijəbə qəsəbə tam orta məktəbinin məzunu Humay Quliyevaya məxsusdur. O, 647 balla Bakı Dövlət Universitetinin riyaziyyat fakültəsinə daxil olmuşdur.
Builki tədris ilində şəhər 1, 2 və 5 saylı, Kijəbə qəsəbə, Ərçivan kənd 3 saylı, Pensər kənd 2 saylı, Koraoba kənd tam orta məktəblərinin pedaqoji kollektivləri yüksək nəticələr əldə etmişlər.
Pensər kənd 2 saylı tam orta məktəb-liseyin direktoru Asif Əsədullayev, Kijəbə qəsəbə tam orta məktəbinin müəllimi, valideyn Azər Kişiyev, Pensər kənd sakini, valideyn İlqar Rufullayev, Prezident təqaüdçüsü, Bakı Dövlət Universitetinin 2-ci kurs tələbəsi Fərid Məmmədəliyev, şəhər 5 saylı tam orta məktəbinin məzunu, Azərbaycan Dövlət Neft Akademiyasının tələbəsi Əli Abdullazadə, Kijəbə qəsəbə tam orta məktəbinin məzunu, Bakı Dövlət Universitetinin tələbəsi Humay Quliyeva, Ərçivan kənd 3 saylı orta məktəbin məzunu, Tibb Universitetinin tələbəsi Ulduzə Səfərova çıxış edərək bu görüşə görə rayon rəhbərliyinə minnətdarlıqlarını bildirmişlər. Çıxışlarda qeyd olunmuşdur ki, respublikamızda bütün sahələrdə olduğu kimi, təhsilin inkişafında da yüksək göstəricilər əldə edilir. Bu inkişafı Astara rayonunun timsalında da aydın görmək olar. Son 5 ildə rayonda 21 yeni məktəb binası tikilmiş, onlarla məktəb əsaslı təmir edilmişdir. Təhsil müəssisələrinin maddi-texniki bazası möhkəmləndirilmiş, məktəblər müasir avadanlıqlarla təchiz edilmişdir. Bütün bunlar təhsilin inkişafına müsbət təsir göstərmişdir. Bunu ötən ilin tədris ilində qazanılan nailiyyətlər bir daha sübut edir. Çıxış edən tələbələr təhsilin inkişafına göstərdikləri qayğıya görə ölkə Prezidenti cənab İlham Əliyevə, Azərbaycan Respublikasının birinci xanımı, Heydər Əliyev Fondunun prezidenti Mehriban Əliyevaya dərin minnətdarlıq duyğularını ifadə etmişlər.
Astara Rayon İcra Hakimiyyətinin başçısı Taleh Qaraşov tədbirdə çıxış edərək bu il ali məktəblərə daxil olmuş gəncləri təbrik etmiş, onlara xoş arzularını və tövsiyələrini bildirmişdir.
T.Qaraşov qeyd etmişdir ki, ulu öndər Heydər Əliyev həmişə təhsilə, tələbə gənclərə böyük qayğı ilə yanaşmış, onlara ən yüksək səviyyədə kömək göstərilməsinə nail olmuşdur. Ulu öndərin siyasətini uğurla davam etdirən Azərbaycan Respublikasının Prezidenti cənab İlham Əliyev də daim tələbə gənclərin qayğı və problemləri ilə maraqlanmış, onların xaricdə və ölkəmizdə beynəlxalq tələblər səviyyəsində təhsil almaları üçün müvafiq sərəncamlar vermişdir. Son illər ölkə miqyasında yeni-yeni təhsil müəssisələrinin inşa edilməsinə, həmin məktəblərin ən müasir avadanlıqlarla təchiz edilməsinə xüsusi diqqət yetirilir. Şübhə yoxdur ki, təhsildə qazanılan yüksək nailiyyətlərdə qabaqcıl pedaqoqların da zəhməti böyükdür.
Tədbirin yekununda ali məktəblərə qəbul zamanı yüksək bal toplamış tələbələrə və qabaqcıl müəllimlərə rayon icra hakimiyyəti başçısının fəxri fərmanları, pul mükafatları və qiymətli hədiyyələr verilmişdir.

Əli NƏCƏFXANLI, "Xalq qəzeti"nin bölgə müxbiri