Müasir Təhsil Mərkəzi xaricdə təhsil almaq istəyən gənclərin məlumatlandırılması işini davam etdirir. Mərkəzin "İSR-plaza" otelinin konfrans salonunda keçirdiyi növbəti görüşdə orta məktəb məzunlarına və media təmsilçilərinə Rusiyanın ən yaxşı ali tibb təhsili, təbabət elmi və müalicə mərkəzi sayılan İ.M.Seçenov adına Moskva Tibb Akademiyası və bu kompleksə daxil olan Birinci Moskva Tibb Universiteti barədə geniş bilgi verildi.
Müasir Tibb Mərkəzinin rəhbəri Şahin Hüseynov bildirdi ki, Müstəqil Dövlətlər Birliyi çevrəsində təhsil sahəsində əməkdaşlığı davam etdirmək, keçmiş əlaqələri qoruyub saxlamaq məramına uyğun olaraq, MTM keçmiş sovet respublikalarının ən nüfuzlu ali məktəbləri ilə səmərəli əməkdaşlıq qurmuşdur. Ölkəmizdə tələbat duyulan ixtisaslar üzrə hər il xeyli gənc xaricdə təhsil almağa yönləndirilir. Bu məqsədlə silsilə tanışlıq görüşləri keçirilir. Növbəti tədbirə İ.M.Seçenov adına Birinci Moskva Tibb Universitetinin xarici əlaqələr üzrə prorektoru, Rusiya Tibb Elmləri Akademiyasının üzvü, professor Pyotr Franseviç Litvitski dəvət olunmuşdur.
Rusiyalı qonaq təmsil etdiyi ali məktəbin tarixi, bugünkü imkanları, xarici ölkələrlə əməkdaşlığı barədə ətraflı məlumat verdi, gənclərin və jurnalistlərin suallarını cavablandırdı. P.Litvitski bildirdi ki, Rusiya İmperator Universitetinin tibb fakültəsi kimi 1758-ci ildən fəaliyyətə başlayan qurum 1930-cu ildə Birinci Moskva Tibb İnstitutuna çevrilmişdir. Rusiyanın dünya şöhrətli təbiblərinin yaradıb formalaşdırdığı bu ali məktəb 1990-cı ildə çoxpilləli təhsili, müasir elm və müalicə şəbəkəsini əhatə edən akademiya statusu almışdır.
Tibb kompleksində 70 müxtəlif təyinatlı bina, ən müasir tədris, elm və müalicə avadanlığı tələbələrin və xəstələrin xidmətindədir. Akademiyanın 17 klinikasında 3 minədək xəstə müalicə alır. 12 fakültə və 154 kafedranın fəaliyyət göstərdiyi universitetdə 12 min tələbə təhsil alır. Bunun 2200-ü 85 ölkədən gələn xarici tələbələrdir. 1949-cu ildən açılmış xarici fakültədə 15 ildir ki, rus dilindən əlavə, ingilis və fransız dillərində də məşğələlər aparılır. Universitet Boloniya prosesinə hazırdır və indi qəbul olunan tələbələr ali məktəbi bu sistem əsasında bitirəcəklər.
Ölkəmizlə geniş əlaqələrdən danışan qonaq qeyd etdi ki, ali məktəbdə uzun illərdən bəri Azərbaycan üçün də çox sayda yüksək ixtisaslı həkim, təbabətin müxtəlif sahələrində elmlər namizədləri və doktorları hazırlanmışdır. Natiq maraqlı bir fakt da söylədi. Akademiyada namizədlik və doktorluq işləri müdafiə etmiş həmyerlimiz professor Abdulla Abdullayev hazırda universitetdə dərs deməklə yanaşı, cərrahiyyə klinikasının da tanınmış mütəxəssisidir. Alimin qızları Samirə və Ülviyyə universiteti fərqlənmə diplomu və qızıl medalla bitirərək, ginekologiya sahəsində namizədlik dissertasiyaları da müdafiə etmişlər. Hazırda akademiyada tələbə, alim və mütəxəssislərdən ibarət Azərbaycan diasporu 400 nəfərədək soydaşımızı birləşdirir. Hər il Azərbaycandan 4-5 nəfər göndərişlə, daha artıq sayda gənc isə imtahan verməklə universitetə qəbul olur. Bu ildən Azərbaycan üçün 57 yer ayrılmışdır.
Sonda P.Litvitski bildirdi ki, Seçenov adına Moskva Tibb Akademiyası barədə daha ətraflı məlumatı onların Azərbaycandan təmsilçisi olan Müasir Təhsil Mərkəzindən (www.tehsil.ru; Tehsil2@ gmail.com; 4-93-37-27; (050) 286-50-05) almaq və əlaqə yaratmaq olar. Rusiyanın ən yaxşı və dünyanın şöhrətli ali tibb təhsili ocağının qapıları Azərbaycanın istedadlı gənclərinin üzünə açıqdır.

Tahir AYDINOĞLU, "Xalq qəzeti"