Avqustun 10-da Bakı Dövlət Universitetinin (BDU) rektoru, Milli Məclisin deputatı, akademik Abel Məhərrəmov ABŞ Ədliyyə Departamentinin Xaricdə Prokurorluğun İnkişafına Yardım Proqramının Avrasiya üzrə regional direktoru, McGill Universitetinin dosenti xanım Katerina Nyukam ilə görüşmüşdür. 
BDU-dan bildirmişlər ki, görüşdə akademik A.Məhərrəmov rəhbərlik etdiyi ali məktəbin fəaliyyəti, onun beynəlxalq əlaqələri, o cümlədən ABŞ universitetləri ilə əməkdaşlığı barədə məlumat vermişdir.
BDU-nun hüquq fakültəsində bir çox fənlərin tədrisində elmi məktəbin formalaşdığını qeyd edən rektor, ekologiya, insan, beynəlxalq ekologiya, dəniz hüquqları sahəsində də elmi məktəblərin formalaşmasının zəruriliyindən danışmışdır. Bildirmişdir ki, müvafiq sahələrin daha da inkişafı üçün tələbələrin Avropa və Amerika universitetlərində təhsillərini davam etdirmələri, müəyyən müddətdə tədqiqat aparmaları, təcrübə keçmələri məqsədəuyğun olardı.
Xanım Katerina Nyukam hüquq sahəsində əlaqələrin qurulması, təkliflərin reallaşması üçün çalışacağını söyləmişdir.
Sonra müzakirələr aparılmışdır.
Görüşdə ABŞ Ədliyyə Departamentinin Bakıdakı rezident hüquq müşaviri Erik Peterson iştirak etmişdir.
Qonaqlar BDU-nun tədris şəraiti ilə tanış olmuşlar.

AzərTAc