Azərbaycan Tələbə Gənclər Təşkilatları İttifaqının (ATGTİ), MDB-yə üzv Ölkələrin Hökumətlərarası Humanitar Əməkdaşlıq Fondunun, Gənclər və İdman Nazirliyinin dəstəyi ilə Qəbələdəki "Yeddi gözəl" istirahət mərkəzində MDB ölkələri tələbə liderlərin yay məktəb-düşərgəsi açılmışdır. 
Avqustun 9-da bu münasibətlə keçirilən mərasimdə gənclər və idman nazirinin müavini İntiqam Babayev, Milli Məclisin deputatı Fəttah Heydərov, ATGTİ-nin sədri Şahin İsmayilov, Qəbələ Rayon İcra Hakimiyyətinin başçısı Səbuhi Abdullayev çıxış edərək ölkədə gənclərə göstərilən dövlət qayğısından, onların təhsilə, idmana cəlb edilməsi, sosial problemlərinin həlli istiqamətində görülən işlərdən, Azərbaycanda ilk dəfə MDB-yə üzv ölkələrin tələbələri üçün təşkil edilən yay düşərgəsinin əhəmiyyətindən danışmışlar.Bildirilmişdir ki, avqustun 13-dək davam edəcək yay düşərgəsində Azərbaycan, Rusiya, Ukrayna, Tacikistan, Qırğızıstan, Qazaxıstan, Moldova, Belarusun müxtəlif ali təhsil ocaqlarında oxuyan 75 tələbə 4 komandaya - "Bakı", "Naxçıvan", "Şuşa" və "Gəncə" komandalarına bölünmüşlər. Tələbələrdən 25-i yerli, 50-si xarici gənclərdir. Komandalar hər gün 4 müxtəlif mövzularda keçiriləcək təlimlərdə iştirak edəcək, gündəlik divar qəzeti hazırlayacaq, simulyasiya oyunlarına, bilik yarışlarına qatılacaq və sosial gecələrdə komanda fəaliyyətlərini təqdim edəcəklər.
Yay məktəbində gənclərin asudə vaxtının səmərəli təşkili ilə yanaşı, xarici tələbələrə Azərbaycan həqiqətləri, xalqımızın tarixi, mədəniyyəti, milli yeməkləri, adət-ənənələri, təhsili, ölkəmizin turizm potensialı barədə ətraflı məlumat veriləcəkdir.
Bu günlərdə MDB-yə üzv ölkələrin Azərbaycandakı səfirlərinin, Milli Məclisin deputatlarının gənclərlə görüşləri gözlənilir.
Düşərgədə bütün komandalara xallar veriləcək, sonda qalib komandaya qiymətli hədiyyələr təqdim olunacaqdır. Bütün tələbələrə isə düşərgədə iştirakla bağlı sertifikat veriləcəkdir.