İyunun 17-də Vaqif Mustafazadə adına Uşaq incəsənət məktəbində şagirdlərin 2010-2011-ci tədris ilinin yekununa həsr olunmuş ənənəvi illik hesabat konserti oldu. Konsertdə respublikanın tanınmış incəsənət ustaları, eləcə də Bakı Şəhər Mədəniyyət və Turizm İdarəsinin şöbə müdiri Bəturə Məmmədəliyeva iştirak etdi.
Hər il olduğu kimi, bu tədris ilinin yekununda da müsabiqə və festifallarda fərqlənmiş müəllim və şagirdlərin idarənin və məktəbin fəxri fərmanı və diplomları ilə təltif olunduğunu açıqlayan məktəbin direktoru, əməkdar mədəniyyət işçisi Elxan Məmmədov xoreoqrafiya şöbəsinin tərkibində fəaliyyət göstərən İradə Əliyevanın rəhbərlik etdiyi "Aysel" rəqs qrupunun adını xüsusi qeyd etdi. Azərbaycan Respublikası Mədəniyyət və Turizm Nazirliyinin, Bakı Şəhər Mədəniyyət və Turizm İdarəsinin əksər tədbirlərində uğurla çıxış edən "Aysel" rəqs kollektivi qardaş Türkiyədə "Nissan" uşaq və Rize Tulum, İtaliyada milli rəqs festivallarında uğurla çıxış edərək Azərbaycanımızın musiqi mədəniyyətini layiqincə təmsil etmişdir. Konsertdə fortepiano, simli alətlər, xalq çalğı alətləri şöbələrinin şagirdləri çıxış etmişlər.
Konsert Sevinc Tağıyevanın rəhbərlik etdiyi xorun kollektivinin ifasında N.Əliverdibəyovun "Azərbaycan" mahnısı ilə başlandı.
Skripkaçılar ansamblının ifasında Conlinin "Çarli Çaplin" (müəllim Sima Əlizadə), VI sinif şagirdi Nuranə Kazımovanın fortepianoda İ.Baxın konserti (müəllim bəstəkar Nüşabə Muradova), Vilzon Hüseynov və Hüseynağa Aslanovun skripkada ifa etdikləri J.Bizenin "Karmen" operasından Antrakt (müəllim Yuliya İbrahimova və Tatyana Mişel), Aydan Dadaşovanın qarmonda Ü.Hacıbəyovun "Leyli və Məcnun operasından "Rəqs" (müəllim Sevil Səmədova), IV sinif şagirdi Aişə Binnətzadənin kamançada Cenkenqonun "Rəqs" (müəllim Vəfa Kərimova) və bir-birindən maraqlı digər musiqi nömrələri tamaşaçılar tərəfindən alqışlarla qarşılandı.
Konser "Aysel" rəqs qrupunun ifasında popuri musiqi nömrələrilə sona yetdi.

Rafiq SALMANOV, "Xalq qəzeti"