İyunun 16-da Azərbaycan Dövlət İqtisad Universitetində (ADİU) Türk Dünyası IX beynəlxalq sosial elmlər konfransı işə başlamışdır. 
Türk dünyası alimlərinin və gənc tədqiqatçılarının iştirak etdikləri konfrans Türk Dünyası Araşdırmaları Vəqfinin təşəbbüsü və ADİU (Azərbaycan), Sakarya və Qazi universitetləri (Türkiyə), İqtisad və Sahibkarlıq Universiteti (Qırğızıstan), Qorqud Ata Dövlət Universitetinin (Qazaxıstan) təşkilatçılığı ilə keçirilir.
Açılış mərasimində konfransın əlaqələndiricisi, Sakarya Universitetinin professoru Ahmet Vecdi Can, ADİU-nun prorektoru, professor Əvəz Bayramov, Sakarya Universitetinin prorektoru, professor Musa Eken və başqaları tədbirin əhəmiyyətindən danışmış, konfransın işinə uğurlar arzulamışlar.
Bildirmişlər ki, hər il Azərbaycan, Türkiyə, Qazaxıstan və Qırğızıstanın müvafiq ali məktəblərində keçirilən belə konfransların məqsədi türk dünyasında sosial sahədə tədqiqat aparan alimlərin qarşılıqlı əlaqələrini dərinləşdirməkdir.
İki günlük tədbir işini iqtisadiyyat, beynəlxalq münasibətlər, biznes inzibatçılığı, hüquq və ədəbiyyat, tarix bölmələrində davam etdirəcəkdir.
Konfransda 200-dək məruzə dinləniləcək, müzakirələr aparılacaqdır.
Beynəlxalq tədbir iyunun 17-də başa çatacaqdır.