Bakının Binəqədi rayonundakı Sulutəpə qəsəbəsindəki 306 nömrəli orta məktəbdə bu təhsil ocağının məzunu, şəhid Vüsal Salahlının anım günü münasibəti ilə tədbir keçirilmişdir. 
Tədbir iştirakçıları əvvəlcə şəhidlərin ruhunu bir dəqiqəlik sükutla yad etdmiş, Vüsal Salahlının ömür yolundan bəhs edən stendlə tanış olmuşlar. Tədbiri giriş sözü ilə açan məktəbin direktoru Cümşüd Hüseynov erməni millətçilərinin tarixən xalqımızın başına gətirdiyi müsibətlərdən söhbət açaraq mənfur düşmənə qarşı mübarizədə şəhid olmuş Vüsal Salahlı kimi vətənpərvər qəhrəman oğullarımızın heç vaxt unudulmayacağını, onların xatirəsinin daim hörmətlə yad olunacağını bildirmişdir.
Tədbirin aparıcıları 1991-ci il mayın 21-də Ağsu rayonunda anadan olmuş şəhid Vüsal Salahlının həyatı haqqında qonaqlara məlumat vermişlər. Bildirmişlər ki, ilk təhsilini əvvəlcə Binəqədi rayonundakı 217 nömrəli orta məktəbdə almış V.Salahlı sonradan təhsilini 306 nömrəli məktəbdə davam etdirmişdir. Ordu sıralarında xidmət edən Vüsal Salahlı Ağdam rayonunda qəhrəmancasına şəhid olmuşdur.
Tədbirdə iştirak edən qonaqlar - rayon icra hakimiyyəti aparatının şöbə müdirləri Natiq Əliyev, Rafiq Ağamalıyev, respublika Müharibə Veteranları Cəmiyyətinin Binəqədi rayon şöbəsinin sədri Telman Hətəmov, şəhidin anası Kəbirə Salahova və başqaları Vüsal Salahlı haqqında danışmışlar. Təhsil ocaqlarında belə tədbirlərin keçirilməsini müsbət qiymətləndirmişlər.
Xatırladaq ki, tədbirdən əvvəl məktəb kollektivi və qonaqlar şəhid Vüsal Salahlının məzarını ziyarət etmişlər.

Vaqif BAYRAMOV, "Xalq qəzeti"