İyunun 11-də Bakıda Amerika-Azərbaycan Təhsil Mərkəzinin (AATM) açılışı olmuşdur.
ABŞ-ın Azərbaycandakı səfiri Mətyu Brayzə açılış mərasimində ölkələrimiz arasında bütün sahələrdə, o cümlədən təhsil sahəsində əlaqələrin genişlənməsindən danışmışdır. Bildirmişdir ki, yeni yaradılan mərkəz Birləşmiş Ştatlarda təhsil almaq arzusunda olanların həmin ölkədəki universitetlərə birbaşa müraciət etməsinə, təhsil proqramları, səfirliyin mübadilə proqramları ilə tanış olmağa imkan verəcəkdir. Xaricdə təhsil almağın əhəmiyyətini vurğulayan səfir ABŞ-da təhsilin bu baxımdan gözəl təcrübə olacağını, Amerika universitetlərinin müəllim və professorları ilə ünsiyyətin tələbə gənclər üçün yeni imkanlar yarada biləcəyini diqqətə çatdırmışdır. İki ölkənin təhsil sistemləri arasında böyük fərqlərin olduğunu qeyd edən M.Brayzə ABŞ-da təhsil almaq istəyən gənclərin əvvəlcədən məlumatlandırılmasının vacibliyini vurğulamış, bu sahədə AATM-in xüsusi rolu olacağına əminliyini bildirmişdir.
M. Brayzə tədbir iştirakçılarını AATM-in açılışı münasibətilə təbrik etmiş, gənclərə onun xidmətlərindən faydalanmağı tövsiyə etmişdir.
Bildirilmişdir ki, Amerika-Azərbaycan Təhsil Mərkəzi İREX, Amerika Şurası, Bakı Təhsil Məlumat Mərkəzi və ABŞ Təhsilli Azərbaycan Məzunları İctimai Birliyi kimi təşkilatları özündə birləşdirən yeni bir qurumdur. Mərkəz bazar günlərindən başqa hər gün buraya baş çəkmək istəyənlərin üzünə açıq olacaqdır.
Sonda tədbir iştirakçıları təhsil mərkəzi ilə yaxından tanış olmuşlar.

AzərTAc