Azərbaycan Milli Elmlər Akademiyası (AMEA) Rəyasət Heyətinin binasında "Azərbaycan Milli Elmlər Akademiyası doktorantlarının elmi konfransı" keçirilir. 
Konfransda AMEA-nın birinci vitse-prezidenti, akademik Arif Həşimov Azərbaycan Prezidenti İlham Əliyevin elm sahəsi ilə bağlı imzaladığı sənədlərin əhəmiyyətindən danışmışdır.
O, ölkəmizdə elmin inkişafına böyük önəm verildiyini xatırlatmışdır. Qeyd edilmişdir ki, akademiyada 5 minədək elmi işçi çalışır. Onlardan 545-i elmlər doktoru, 2 min 116-sı fəlsəfə doktoru və elmlər namizədidir. 221 nəfər fəlsəfə doktoru proqramı üzrə çalışan doktorant, 947 dissertant vardır. Dissertantlardan 420-si xarici ölkə vətəndaşlarıdır. 2010-cu ildə 27 elmlər doktoru, 121 fəlsəfə doktoru dissertasiyaları müdafiə olunmuşdur.
Bildirilmişdir ki, konfransa 100-dən çox doktorant məruzə təqdim etmişdir.
"Pomidorun yarpaqlarının saralıb burulması virus (TYLCV) xəstəliyinin PZR metodu ilə təyini", "Tiflis müsəlman əmirliyi" və digər mövzularda məruzələr dinlənilmiş, müzakirələr aparılmışdır.
Sonra konfrans bölmə iclaslarında davam etdirilmişdir.

AzərTAc