Mayın 5-də Bakı Dövlət Universitetində (BDU) Heydər Əliyev məktəbinin ümummilli liderin anadan olmasının 87-ci ildönümünə həsr edilmiş növbəti məşğələsi keçirilmişdir.
Tanınmış alimlərin, müəllim və tələbələrin iştirak etdikləri məşğələdə BDU-nun rektoru, Milli Məclisin deputatı, akademik Abel Məhərrəmov ulu öndər, qüdrətli şəxsiyyət Heydər Əliyevin tarixi xidmətlərindən danışmış, ölkəmizin iqtisadiyyatında, elm və təhsilində, digər sahələrində qazanılan nailiyyətlərin onun adı ilə bağlı olduğunu vurğulamışdır.
Akademik A.Məhərrəmov dahi rəhbər Heydər Əliyevin elmin, təhsilin inkişafına daim böyük əhəmiyyət verdiyini xatırladaraq ümummilli liderin ideyalarının Prezident İlham Əliyev tərəfindən uğurla həyata keçirildiyini nəzərə çarpdırmışdır.
Yeni Azərbaycan Partiyası (YAP) sədrinin müavini-icra katibi, Milli Məclisin deputatı Əli Əhmədov xalqımızın böyük oğlu Heydər Əliyevin müstəqil dövlətimizin yaranmasında, inkişafında və dünyada tanınmasında əvəzsiz rolundan bəhs etmişdir.
1988-1992-ci illərdə ölkəmizin parçalanmaq təhlükəsi ilə üzləşdiyini xatırladan Ə.Əhmədov 1993-cü ildə xalqın tələbi ilə ulu öndər Heydər Əliyevin ikinci dəfə hakimiyyətə qayıdışından sonra respublikamızın bu təhlükədən xilas olduğunu söyləmişdir. O, müdrik dövlət xadimi Heydər Əliyevin şəxsiyyətinin böyüklüyündən danışaraq, ümummilli liderin ideyalarının əbədi yaşayacağını vurğulamışdır.
Sonra BDU-nun xeyli sayda əməkdaşı və tələbəsi Yeni Azərbaycan Partiyasına üzv qəbul olunmuşdur.
AzərTAc