Bakı Dövlət Universitetində (BDU) "Türk dünyası: dünəni və bu günü" mövzusunda beynəlxalq elmi konfrans keçirilir.
Azərbaycan, Türkiyə, Rusiya, Gürcüstan, Özbəkistan, İran, ABŞ, Yaponiya, Belarus və digər ölkələrdən olan alim və mütəxəssislərin iştirak etdikləri konfransda BDU-nun rektoru, Milli Məclisin deputatı, akademik Abel Məhərrəmov ümummilli lider, görkəmli dövlət xadimi Heydər Əliyevin elmin, təhsilin inkişafına daim böyük önəm verdiyini, ulu öndərin ideyalarının Prezident İlham Əliyev tərəfindən uğurla həyata keçirildiyini bildirmişdir.
Rektor dövlətimizin başçısı İlham Əliyevin müvafiq sahələrin inkişafı ilə bağlı imzaladığı sənədlərin əhəmiyyətini vurğulamışdır.
Bakı Dövlət Universitetinin fəaliyyətindən danışan akademik A.Məhərrəmov BDU-nun beynəlxalq əlaqələrinin genişləndiyini diqqətə çatdırmışdır.
Beynəlxalq konfrans barədə məlumat verən rektor türk xalqları birliyinin əhəmiyyətindən bəhs etmişdir.
Azərbaycan Tarix Qurumunun sədri, tarix elmləri doktoru Tofiq Mustafazadə mövzunun aktuallığını vurğulamışdır.
Professor Əsməd Muxtarova türk xalqlarının qədim dövr və orta əsrlər dövrü dövlətçilik tarixi məsələləri haqqında danışmış, bu xalqların zəngin dövlətçilik ənənələrinə malik olduğunu söyləmişdir.
Sonra konfransın "Türklərin qədim tarixinin problemləri", "Orta əsrlərdə və yeni dövrdə türklərin Rusiya, Qərbi Avropa və Çinlə münasibətləri", "Türk dünyası bu gün: inteqrasiya və birliyə doğru addımlar", "Türk xalqlarının mədəniyyəti", "XX əsr türk tarixi" və digər bölmələrində məruzələr dinlənilmiş, müzakirələr aparılmışdır.
Mayın 24-də başa çatacaq beynəlxalq konfransa 47 məruzə təqdim olunmuşdur.