Mayın 19-da Bakı Dövlət Universitetində (BDU) müasir Türkiyə dövlətinin qurucusu Mustafa Kamal Atatürkü Anma, Gənclik və İdman Bayramı qeyd edilmişdir. 
BDU-nun mətbuat və informasiya şöbəsindən AzərTAc-a bildirmişlər ki, bayram böyük öndərin 1919-cu il mayın 19-da silahdaşları ilə birlikdə Samsun səfərinə, yadelli işğalçılara qarşı müqavimət hərəkatına başçılıq etməsinə həsr olunmuşdur.
Ulu öndərlər - Heydər Əliyevin və Mustafa Kamal Atatürkün xatirələri bir dəqiqəlik sükutla yad edildikdən sonra hər iki ölkənin dövlət himnləri səslənmişdir.
Tədbiri giriş sözü ilə açan BDU-nun rektoru, Milli Məclisin deputatı, akademik Abel Məhərrəmov bu günü böyük tarixi bayram adlandıraraq Atatürkün Türkiyənin siyasi həyatında oynadığı roldan, əbədiyaşar ideyalarından bəhs etmişdir. Azərbaycan-Türkiyə münasibətlərindən, bu əlaqələrin dostluq, qardaşlıq, strateji tərəfdaşlıq zəminində inkişafından danışan Abel Məhərrəmov diqqətə çatdırmışdır ki, bu gün dünyada 10-a yaxın dövlətin, o cümlədən Azərbaycanın və Türkiyənin ümummilli lideri vardır. Bir millət olaraq biz əsrlər boyu iki böyük dövlət xadimi və xilaskarla - Heydər Əliyev və Mustafa Kamal Atatürklə fəxr edəcəyik.
Akademik eyni zamanda, türk dünyasının parlaq gələcəyinə inandığını söyləmiş, gəncləri vətənpərvərliyə, birliyə, bütün türk dünyasına layiqli övlad olmağa səsləmişdir.
Türkiyənin Azərbaycandakı səfiri Hulusi Kılıc ölkəsinin tarixindən, inkişaf mərhələlərindən, regionda nüfuzundan, dünya siyasətinə təsirindən, beynəlxalq təşkilatlarla əməkdaşlığından, bu təşkilatların səlahiyyətli qurumlarında təmsilçiliyindən söhbət açmışdır.
Türkiyə səfirliyinin təhsil üzrə müşaviri Halis Koyuncuoğlu çıxış edərək ölkələrimiz arasında təhsil sahəsində əməkdaşlığın əhəmiyyətini vurğulamışdır.
Bayram tədbiri maraqlı konsert proqramı ilə davam etdirilmişdir.