İstedadlı şagirdlərlə görüş olmuşdur
Son illər rayonun onlarla müəllimi respublika müəllimləri arasında keçirilən müsabiqələrdə fəal iştirak edir, şagirdlər fənn olimpiadalarının qalibi olur, orta məktəb məzunları ali məktəblərə qəbul imtahanlarında yüksək bal toplayırlar.
Təhsildə qazanılmış nailiyyətlər bu gün də davam etməkdədir. Belə ki, bu yaxınlarda respublika Təhsil Nazirliyi tərəfindən ümumtəhsil məktəblərinin yuxarı sinif şagirdləri arasında keçirilmiş sınaq imtahanlarının nəticələri bunu bir daha sübut edir. Sevindirici haldır ki, sınaq imtahanlarının nəticələrinə görə Qax rayonunun ümumtəhsil məktəbləri respublikamızın kənd rayonları arasında ikinci yerdədir.
Rayon icra hakimiyyətinin başçısı Musa Şəkiliyevin təhsildə yüksək nəticələr əldə edən ümumtəhsil məktəblərinin bir qrup istedadlı şagirdi ilə görüşündə məhz təhsildə qazanılan uğurlardan danışıldı. Rayon icra hakimiyyətinin başçısı əvvəlcə sınaq imtahanlarında yüksək nəticələr əldə etdiklərinə görə şagirdləri təbrik etdi. Bildirdi ki, rayonda həmişə təhsilə ictimai maraq yüksək olub. Məhz bunun nəticəsidir ki, məktəblərimizin məzunlarının bir çoxu ali məktəblərdə təhsillərini davam etdirərək yüksək ixtisaslı mütəxəssislər kimi respublikamızın müxtəlif elm, mədəniyyət, təhsil müəssisələrində, dövlət idarəetmə orqanlarında, istehsalatda müvəffəqiyyətlə çalışırlar.
Bu gün ölkəmizdə iqtisadiyyatın, elmin, texnikanın inkişafı ilə əlaqədar yüksək ixtisaslı kadrlara tələbat daha da artıb. Ona görə də rayonumuzda təhsil sahəsində yaranan bu ənənə davam etdirilməli, siz məktəblilər daha yaxşı çalışaraq, ali təhsil almaqla yüksək ixtisaslı mütəxəssislər kimi respublikamızdakı genişmiqyaslı quruculuq işlərində fəal iştirak etməlisiniz.
Daha sonra Musa Şəkiliyev təhsildə əldə edilən müvəffəqiyyətlərdə pedaqoji kollektivlərin əməyini yüksək qiymətləndirərək onlara çətin və şərəfli işlərində daha böyük uğurlar dilədi. O, eyni zamanda, rayonda fəaliyyət göstərən "Araz" kursunun da təhsilin inkişafında müəyyən rol oynadığını xüsusi qeyd etdi. Sonra çıxış edən digər natiqlər rayonun təhsil işçilərinin əldə etdikləri müvəffəqiyyətləri qeyd etməklə bərabər, bu sahədə qarşıda duran vəzifələrdən də danışdılar. Bildirdilər ki, daha böyük uğurlar qazanmaq üçün indən sonra da səylə çalışacaqlar.
Tədbirin sonunda məktəblilərə icra hakimiyyəti adından hədiyyələr təqdim edildi, xatirə şəkilləri çəkildi.