Mayın 11-də BMT-nin Azərbaycan üzrə əlaqələndirici koordinatoru Fikrət Akçura Azərbaycan Turizm İnstitunun qonağı olmuşdur. İnstitutun rektoru, tarix elmləri doktoru, professor Cəfər Cəfərov qonağa ATİ-nin 5 il öncə fəaliyyətə başladığını, amma buna baxmayaraq ölkənin qocaman təhsil ocaqları sırasında layiqli yer tutmasını şərtləndirən səbəblər barədə məlumat vermişdir. O, 2010-cu ili ilk məzun ili kimi tarixləşən ali təhsil ocağının turizm sənayesində çalışacaq yüksək ixtisaslı kadr hazırlığında təhsil, təcrübə və təlimin başlıca şərt sayıldığını qonağın nəzərinə çatdırmışdır.
Rektor C. Cəfərov 2011-ci ilin "Turizm ili" elan edilməsi ilə əlaqədar olaraq institutda görülən işlər və qazanılan uğurlardan söz açaraq bildirmişdir: "BMTİP- in Mədəniyyət və Turizm Nazirliyi ilə həyata keçirtdiyi "Turizmin inkişafı layihəsi"çərçivəsində ATİ-nin nəzdində Tədqiqat və İnkişaf Mərkəzi yaradılmışdır. Hazırda fondunda 7 minədək kitab və informasiya daşıyıcısı olan, ölkədə turizm üzrə ixtisaslaşmış yeganə kitabxana informasiya mərkəzi, həmçinin xüsusi təlim otağı məhz "Turizmin inkişafı layihəsi"nin dəstəyi ilə yaradılmışdır. Bu ilin fevral ayından ATİ-nin BMT-nin əlaqələndirici qurumu olan "Akademik təsir" proqramının üzvləri sırasına qoşulması ali təhsil ocağının 10 qlobal prinsipin dəstəklənməsi istiqamətində fəaliyyətinə təkan verəcəkdir." Fikrət Akçura səmimi qarşılandığı və institunun fəaliyyəti barədə ətraflı məlumat aldığı üçün rektora təşəkkür etmişdir. Şərq ölkələrində, eləcə də Pakistanda, Özbəkistanda, Qazaxıstandakı fəaliyyətinin Azərbaycanda da uğurla davam etdirəcəyini bildirmişdir. Azərbaycanda çalışacağı müddətdə ali təhsil ocağı ilə sıx əməkdaşlıq edəcəyini xüsusi vurğulamışdır. İnstitutun tələbə və müəllim kolektivinə gələcək fəaliyyətlərində nailiyyətlər arzulamışdır.

Z. BƏŞİRQIZI, "Xalq qəzeti"