Kürdəmirin Bala Kəngərli kənd ümumi orta məktəbi üçün yeni tədris binası istifadəyə verilmişdir.
İnşasına ötən ilin noyabr ayından başlanılmış məktəb binası Yaponiya hökumətinin "Ot kökləri və insan təhlükəsizliyi" qrant vəsaiti hesabına "Sülh" qeyri-dövlət humanitar təşkilatı tərəfindən tikilmişdir.
Bu münasibətlə keçirilən mərasimdə rayon icra hakimiyyətinin təhsil, səhiyyə və mədəniyyət məsələləri üzrə müavini Əbülfət Mikayılov rayonda təhsilin maddi-texniki bazasının möhkəmləndirilməsi istiqamətində həyata keçirilən tədbirlərdən danışmışdır. Məlumat vermişdir ki, son 6 ildə Kürdəmirdə 6 min yerlik 23 məktəb binası tikilib istifadəyə verilmişdir. Son bir neçə ildə təhsil müəssisələrinə 503 kompyuter dəsti verilmişdir.
Məktəbin müəllimi Vidadi Dəmirov, kənd ağsaqqalı İkram Əzizov, şagird Nərmin Əzizova çıxış edərək Yaponiya hökumətinə, eləcə də yeni tədris ocağının tikilib istifadəyə verilməsində əməyi olanlara minnətdarlıqlarını bildirmişlər.
"Sülh" qeyri-hökumət humanitar təşkilatının sədri Dilşad Ağalarova müəllim və şagirdləri təbrik etmiş, son illər təşkilatın Kürdəmir rayonunda reallaşdırdığı layihələrdən danışmışdır.
Axırda rayon icra hakimiyyətinin başçısı Fəxrəddin Məlikov məktəbin şagird və pedaqoji kollektivini, kənd sakinlərini əlamətdar hadisə münasibətilə təbrik etmiş, uşaqlara elmi biliklərin əsaslarına yiyələnməkdə uğurlar arzulamışdır. Natiq əminliklə bildirmişdir ki, dost yapon xalqı təbiətin acı sınağına mərdliklə sinə gərəcək və bu sınaqdan uğurla çıxacaqdır.
Açılışı bildirən qırmızı lent kəsilmiş, qonaqlar bina ilə tanış olmuşlar.