Mayın 4-də Azərbaycan Dillər Universitetində (ADU) Yeni Azərbaycan Partiyasının (YAP) Nəsimi rayon təşkilatı ümummilli lider Heydər Əliyevin anadan olmasının 87-ci ildönümünə həsr olunmuş tədbir keçirmişdir.
Əvvəlcə Azərbaycanın Dövlət himni səsləndirilmiş və ümummilli liderin həyat və fəaliyyətini əks etdirən videoçarx nümayiş etdirilmişdir.
Tədbiri giriş sözü ilə açan YAP Nəsimi rayon təşkilatının sədri, Milli Məclisin deputatı Məlahət Həsənova ümummilli lider Heydər Əliyevin Azərbaycan dövləti qarşısında böyük xidmətlərindən danışmışdır. M.Həsənova vurğulamışdır ki, əgər dahi rəhbərimiz Heydər Əliyev olmasaydı, bu gün biz də öz müqəddəratını təyin edə bilməyən ölkələr sırasında ola bilərdik.
ADU-nun rektoru, Milli Məclisin beynəlxalq münasibətlər və parlamentlərarası əlaqələr komitəsinin sədri, professor Səməd Seyidov ulu öndər Heydər Əliyevin Azərbaycan təhsilinə verdiyi töhfələrdən söz açmışdır.
Azərbaycan Tibb Universitetinin (ATU) rektoru, professor Əhliman Əmiraslanov, Nəsimi rayon İcra hakimiyyətinin başçısı Nəsib Məhəməliyev ulu öndər Heydər Əliyevin məqsədyönlü siyasətinin uğurlu nəticələrini xatırladaraq, bu kursun Prezident İlham Əliyev tərəfindən uğurla davam etdirildiyini diqqətə çatdırmışlar.
Bildirilmişdir ki, Azərbaycan elminin, təhsilinin, səhiyyəsinin inkişafında ulu öndərimizin xidmətləri misilsizdir. Onun sayəsində bu gün Azərbaycanda yüksək təhsilli gənclər ordusu mövcuddur.
İclasda çıxış edən tələbələr dahi Heydər Əliyevin gənclər üçün hər zaman örnək olduğunu, əbədi olaraq lider qalacağını qeyd etmişlər.
Tədbirin sonunda YAP Nəsimi rayon təşkilatı tərəfindən Azərbaycan xalqının ümummilli lideri Heydər Əliyevin irsinin öyrənilməsi, araşdırılması və təbliği məqsədi ilə rayonun ərazisindəki 7 ali məktəbin 400-dən artıq tələbəsinin iştirak etdiyi ənənəvi inşa müsabiqəsinin qalibləri mükafatlandırılmışdır.
AzərTAc{nl}