Aprelin 23-də Türkiyənin Ondoqquz May Universitetinin rektoru, professor Hüseyn Akanın başçılıq etdiyi nümayəndə heyəti Bakı Dövlət Universitetində (BDU) olmuşdur. 
Görüşdə BDU-nun rektoru, Milli Məclisin deputatı, akademik Abel Məhərrəmov rəhbərlik etdiyi ali məktəbin fəaliyyəti, beynəlxalq əlaqələri barədə məlumat vermiş, Azərbaycan ilə Türkiyənin təhsil sahəsindəki əməkdaşlığının əhəmiyyətindən danışmışdır.
Universitetdə təhsilin inkişafı üçün reallaşdırılan tədbirlərdən bəhs edən rektor BDU ilə Türkiyənin ayrı-ayrı ali məktəbləri arasında əlaqələrin genişləndiyini xatırlatmışdır.
Professor Hüseyn Akan müasir dünyada təhsilin önəmli rolunu vurğulamışdır. Universitetlər arasında birgə tədqiqatların, təcrübə mübadiləsi aparılmasının əhəmiyyətini qeyd edən qonaq, Ondoqquz May Universitetinin BDU ilə əməkdaşlığının səmərəli olacağına əminliyini bildirmişdir.
Sonra Bakı Dövlət Universiteti ilə Ondoqquz May Universiteti arasında əməkdaşlığa dair anlaşma memorandumu imzalanmışdır.
Sənədi akademik A. Məhərrəmov və professor Hüseyn Akan imzalamışlar.
Anlaşma Memorandumunda iki universitet arasında tədqiqatçı, tələbə, magistr və doktorantura, təcrübə mübadilələrinin aparılması, birgə proqram və layihələrin həyata keçirilməsi, təhsilin magistratura və doktorantura pillələri üzrə ikili diplom proqramlarının hazırlanması, tətbiqi və digər məsələlər nəzərdə tutulur.