Azərbaycanın xarici işlər nazirinin müavini, Diplomatik Akademiyanın rektoru Hafiz Paşayevin rəhbərlik etdiyi nümayəndə heyəti aprelin 26-dan 29-dək Türkiyədə səfərdə olmuşdur.
Türkiyənin aparıcı təhsil müəssisələrinin təcrübəsini öyrənmək məqsədi daşıyan səfərdə rektor H.Paşayevin ilk görüşü Orta Doğu Texniki Universitetinin rektoru, professor Əhməd Açar ilə olmuşdur. H.Paşayevin rəhbərlik etdiyi nümayəndə heyəti universitetin beynəlxalq münasibətlər, sosial elmlər və xarici dillərin tədris üsulları ilə tanış olmuşdur.
Bundan əlavə, ADA-nın rektoru Bilkənt Universitetinin prezidenti, professor Əli Doğramacı və rektoru, professor Abdulla Atalar ilə görüşmüşdür. Azərbaycan nümayəndə heyəti Bilkənt Universitetinin dərs otaqları, laboratoriyaları, kitabxana, yataqxana və istirahət mərkəzlərində tələbələr üçün yaradılmış şəraitlə tanış olmuşdur.
Səfər çərçivəsində H.Paşayev Türkiyənin Xarici İşlər Nazirliyində olmuş, Turkiyə Diplomatik Akademiyasının rektoru, səfir Sina Baydur ilə müzakirələr aparmışdır.
H.Paşayev səfərin məqsədindən danışaraq bildirmişdir ki, Türkiyənın aparıcı universitetlərində keçirdiyimiz görüşlər və əldə etdiyimiz təcrübə Azərbaycan Diplomatik Akademiyasının fəaliyyətinə lazımi töhfəsini verəcəkdir. Biz inanırıq ki, böyük təcrübəsi, minlərlə uğurlu və bacarıqlı tələbəsi olan Orta Doğu Texniki Universiteti və Bilkənt Universiteti ilə əməkdaşlığımız Azərbaycanda beynəlxalq münasibətlərin və sosial elmlərin inkişafında xeyirli olacaq və Diplomatik Akademiyada tədrisin mükəməlləşməsinə kömək edəcəkdir.
AzərTAc