Aprelin 15-də ölkəmizə gələn Türkiyənin Mərmərə Universitetinin rektoru Mehmet Zafer Gülün başçılıq etdiyi nümayəndə heyəti Azərbaycan Tibb Universitetinin (ATU) tədris-terapevtik klinikasında olmuşdur.
ATU-nun rektoru, Milli Məclisin deputatı, akademik Əhliman Əmiraslanov Prezident İlham Əliyevin sərəncamı ilə tikilib-istifadəyə verilən klinika haqqında məlumat vermişdir. Bildirmişdir ki, təhsil müəssisəsində 160 professor, 500-dən çox dosent çalışır. Rektor burada 8 min tələbənin oxuduğunu və onların 1000 nəfərinin xarici ölkələrdən gəldiyini, eləcə də yeni cərrahiyyə klinikasının tikilməkdə olduğunu diqqətə çatdırmışdır. İstanbul Universiteti ilə tələbə və mütəxəssis mübadiləsi aparıldığını deyən rektor Mərmərə Universiteti ilə də əlaqələrin yaradılacağına əminliyini ifadə etmişdir.
Mehmet Zafer Gül rəhbərlik etdiyi universitetin tədris prosesi barədə danışmış, eyni zamanda, ATU-nun klinikasının fəaliyyətindən razı qaldığını bildirmişdir.
Tanışlıq xarakteri daşıyan görüşdə əməkdaşlıq perspektivləri müzakirə edilmişdir.