Azərbaycan Tibb Universitetində (ATU) "Azərbaycan universitetlərində Beynəlxalq Əlaqələr Şöbəsinin qurulması və beynəlxalq səviyyədə şəbəkə yaradılması üzrə TEMPUS layihəsi"nə həsr olunmuş beynəlxalq konfrans öz işinə başlamışdır.  
Ali məktəb rektorlarının, təhsil işçilərinin, İtaliya, Polşa və digər xarici ölkələrin müvafiq universitetləri nümayəndələrinin iştirak etdikləri tədbirdə ATU-nun rektoru, akademik Əhliman Əmiraslanov müasir şəraitdə dünya universitetləri arasında təhsil əlaqələrinin, təcrübə, müəllim-tələbə mübadiləsinin əhəmiyyətini vurğulamış, indiki layihənin Avropa universitetləri arasında əlaqələrin inkişafında səmərəli rol oynayacağını bildirmişdir.
Konfransda Genuya Universiteti (İtaliya), Zigen Universiteti (Almaniya), Bıdqoş Universiteti (Polşa), Nise- Sophia Antipolis Universiteti (Fransa) və Avropanın digər ali məktəblərinin, Azərbaycan Tibb Universiteti, Azərbaycan Dövlət Neft Akademiyası, Qafqaz Universiteti və "Odlar Yurdu" Universitetinin bu layihə üzrə həyata keçirdikləri tədbirlər, qazanılan nailiyyətlər, təcrübələr barədə geniş məlumatlar verilmişdir. Bildirilmişdir ki, layihəyə qoşulmuş Azərbaycan universitetləri dünyanın, o cümlədən Avropanın aparıcı ali məktəbləri ilə səmərəli əlaqələr qurmuşdur.
Genuya Universitetinin professoru, layihənin əlaqələndiricisi Franko Prasuello müasir dünyada təhsilin rolundan, bu sahədə təcrübə mübadiləsinin əhəmiyyətindən danışmışdır.
Sonra təqdimatlar olmuş, müzakirələr aparılmışdır.
Konfrans aprelin 8-də davam edəcəkdir.

AzərTAc