Azərbaycanı beynəlxalq məktəbli yarışmalarında uğurla təmsil edən "Çağ" Öyrətim İşlətmələri Şirkətinin təşkilatçılığı ilə beşinci dəfədir ki, dünya ölkələrinin yeniyetmə ekoloji layihə müəllifləri Bakıya toplaşırlar. Aprelin 8-9-da Azərbaycan paytaxtı "İNERO - Euroasiya" Ətraf Mühitin Mühafizəsi V Beynəlxalq Layihə Olimpiadasına ev sahibliyi edəcək.
"Çağ" Öyrətim Şirkətində keçirilən mətbuat konfransında təşkilat komitəsinin rəhbərliyi bu barədə jurnalistlərə ətraflı məlumat verdi, sualları cavablandırdı. Şirkətin Azərbaycan - Türkiyə Özəl Liseyləri Baş İdarəsinin rəisi Arif Gömləksiz bildirdi ki, təmsil etdiyi qurumun təşəbbüsü, Təhsil, Ekologiya və Təbii Sərvətlər nazirliklərinin, Azərbaycan Dövlət Neft Şirkətinin və İctimai Teleradio Yayımları Şirkətinin dəstəyi ilə keçirilən beynəlxalq layihə olimpiadasının məqsədi dünya məktəblilərinin ekoloji biliyini və tərbiyəsini artırmaq, onları bu bəşəri bəlaya qarşı mübarizədə fəallaşdırmaqdır. Müxtəlif ölkələrin ekoloq şagirdləri bu yarışmaya ildən-ilə daha böyük maraq göstərirlər. 5 il əvvəl birinci olimpiadaya 17 ölkədən 90 layihə təqdim olunmuşdusa, bu il 34 ölkədən 250 məktəblinin iştirakı gözlənilir. Yarışmada azərbaycanlı yeniyetmələr uğurlarını ibəil artırırlar.
"Çağ" Öyrətim Şirkətinin prezidenti Ənvər Özərən isə beynəlxalq yarışmanın başqa bir hədəfini - Azərbaycanı dünyanın sabahkı sahiblərinə tanıtmaq, ölkəmizin sivil inkişafını əcnəbilərə göstərməklə bağlı proqramı açıqladı. Natiq bildirdi ki, 5 ildir ki, dalbadal keçirilən "İNERO - Euroasiya" yarışması artıq Bakını dünyanın təhsil şəbəkəsində beynəlxalq şagird olimpiadaları mərkəzlərindən biri kimi tanıdıb.
Mətbuat konfransında bildirildi ki, aprelin 8-9-da ən yaxşı layihələrin Bakı Əl Oyunları Sarayında geniş sərgisi keçiriləcək, sonra qaliblərin təntənəli mükafatlandırılması mərasimi olacaq.

Tahir AYDINOĞLU, "Xalq qəzeti"