Azərbaycanda səfərdə olan Rusiyanın Stavropol vilayətinin qubernatoru Valeri Qayevskinin rəhbərlik etdiyi nümayəndə heyəti aprelin 29-da Bakı Slavyan Universitetində (BSU) olmuşdur.
Qonaqlar əvvəlcə BSU-da fəaliyyət göstərən "Rusiya mədəniyyət mərkəzi" və muzeylə tanış olmuşlar.
Tədbirdə çıxış edən BSU-nun rektoru, AMEA-nın müxbir üzvü Kamal Abdullayev demişdir ki, bu görüş Stavropol vilayətinin təhsil müəssisələri ilə sıx əlaqələrin qurulmasına, ölkələrimiz arasında elm, təhsil və mədəniyyət sahəsində əlaqələrin genişləndirilməsinə xidmət edəcəkdir.
Rektor rəhbərlik etdiyi ali məktəbin tarixi, beynəlxalq əlaqələri barədə məlumat vermişdir. O demişdir ki, hər birimiz ümummilli lider Heydər Əliyevin müdrikliyi sayəsində yarım əsrdən çox vaxtda Azərbaycanda rus dili müəllimləri hazırlayan ali təhsil müəssisəsinin bazasında müasir, çoxixtisaslı, regionda yeganə slavistika mərkəzi olan universitet yaradılmasından qürur hissi duyuruq. Bu görüş ölkələrimiz və xalqlarımız arasında humanitar əməkdaşlıqda, elm və təhsil mərkəzləri arasında əlaqələrin inkişafında yeni imkanlar yaradacaqdır.
Qubernator Valeri Qayevski tələbə və müəllimləri salamlamış, Bakıda olduğu müddətdə burada qonaqpərvərliklə qarşılandığını vurğulamışdır. Qeyd etmişdir ki, Azərbaycan hökuməti ilə Stavropol vilayəti arasında bu günlərdə iqtisadiyyat, mədəniyyət və digər sahələri əhatə edən mühüm bir saziş imzalanmışdır. Sazişin əsas istiqaməti təhsil sahəsidir. Burada söhbət peşəyə yiyələnməkdən, elmin inkişafından gedir. Qubernator BSU-nu Qafqazda qabaqcıl universitetlərdən biri adlandırmışdır.
K.Abdullayev BSU-nun nəşr etdirdiyi "Azərbaycanda rus dili" ("Russkiy yazık v Azerbaydjane") kitabını qubernatora hədiyyə etmişdir.
Stavropol Dövlət Universitetinin rektoru, professor Vladimir Şapovalov rəhbərlik etdiyi ali təhsil müəssisəsinin fəaliyyəti barədə ətraflı məlumat vermişdir.
Sonda BSU ilə Stavropol Dövlət Universiteti arasında əməkdaşlıq haqqında müqavilə imzalanmışdır.
AzərTAc{nl}