Azərbaycan Turizm və Menecment Universitetində təhsilin inkişafı və beynəlxalq standartlara uyğunlaşdırılması ilə bağlı ciddi addımların atılması prosesi davam edir. Bununla bağlı bir sıra beynəlxalq təşkilatlarla əməkdaşlıq və danışıqlar prosesinə artıq start verilmişdir.

ATMU-nun mətbuat xidmətindən bildiriblər ki, universitetdə Avropa İttifaqının maliyyələşdirdiyi və Təhsil Nazirliyinin layihəsi olan “Milli Kvalifikasiya Çərçivəsi (MKÇ)” ilə əməkdaşlıq məqsədi ilə görüş keçirilmişdir. Görüşdə ATMU-nun elm və inkişaf məsələləri üzrə prorektoru Anar Eminov, biznes idarəçiliyi fakültəsinin dekan müavini Hüseyn Həsənov, MKÇ-nin təhsil standartları və kurrikulum inkişafı üzrə eksperti Jenevyeva Makqabe, təhsil standartları və qiymətləndirmənin inkişafı üzrə meneceri Aynur Kərimova və təhsil proqramları və kurrikulumların inkişafı üzrə meneceri Mehparə Əhmədova iştirak etmişlər.

Görüşü açan elm və inkişaf məsələləri üzrə prorektor Anar Eminov ATMU-da dünya standartlarına cavab verəcək təhsil mühitinin daha da inkişaf etdirilməsi sahəsində atılan ciddi addımları sadalamışdır. Dərslərin keçirilməsi zamanı müasir texnologiyanın tətbiqi, tələbələrin biliklərinin qiymətləndirilməsi və tədris prosesinin təşkili üçün elektron sistemin inkişafı ilə bağlı qonaqlara ətraflı məlumat vermişdir. Boston modeli çərçivəsində ATMU-nun tədris planlarının dünyanın qabaqcıl ali təhsil müəssisələri ilə məsləhətli şəkildə yenidən qurulması və sənayenin tələblərinə uyğunlaşdırılması prosesinin icrası vəziyyətini məruzə etmişdir. Qeyd etmişdir ki, Azərbaycan Prezidentinin 2016-cı il 6 dekabr tarixli fərmanı ilə təsdiq edilmiş “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”-ndə göstərilən, eyni zamanda, ATMU-nun bazasında turizm üzrə MBA proqramının yaradılması ilə bağlı işlər yekunlaşmaq üzrədir. Bu ildən MBA üçün müxtəlif ixtisaslara 60 yer ayrılmışdır ki, qarşıdan gələn 2018-2019-cu tədris ilində bu ixtisas üzrə tədrisin təşkili həyata keçiriləcəkdir.

ATMU-nun biznes idarəçiliyi fakültəsinin dekan müavini Hüseyn Həsənov qonaqlara ATMU-da tələbələrin biliklərinin qiymətləndirilməsi və ümumi təhsil standartları ilə bağlı məruzə etmişdir.

Görüşdə, həmçinin təhsil müəssisələri qarşısında duran mühüm və aktual məsələlərə toxunulmuşdur. Sənaye və təhsil arasında boşluğun minimuma endirilməsi, tədris prosesində sənaye ağırlıqlı tədris planlarının tətbiqi, həmçinin təhsilin müxtəlif səviyyələri arasında uyğunluq zamanı daha ümumidən xüsusiyə keçid prinsipinin tətbiqi ilə bağlı strateji məsələlər müzakirə olunmuşdur.

Z. BƏŞİRQIZI,
“Xalq qəzeti”