Riyaziyyat və Mexanika İnstitutunun elmi işlər üzrə direktor müavini, AMEA-nın müxbir üzvü Vaqif Quliyev və həmin institutun Riyazi analiz şöbəsinin baş elmi işçisi, AMEA-nın professoru Rövşən Bəndəliyev Rusiyanın Rostov vilayətində keçirilən "Harmonik analiz və operatorlar nəzəriyyəsinin müasir metodları, problemləri və tətbiqləri” mövzusunda VIII beynəlxalq konfransda iştirak ediblər.

www.science.gov.az saytı yazır ki, konfransın plenar iclasında AMEA-nın müxbir üzvü V.Quliyev "Sinqulyar və kəsr inteqral operatorların kommutatorlarının Orliç fəzalarında Lipschitz funksiyaları ilə xarakteristikası" mövzusunda məruzə edib. Alim, həmçinin konfransın “Funksional analiz və operatorlar nəzəriyyəsi” seksiyasına rəhbərlik edib.

Beynəlxalq tədbirdə AMEA-nın professoru R.Bəndəliyevin "Dəyişən dərəcəli Lebeq fəzalarında Hausdorf operatoru" mövzusunda məruzəsi maraqla qarşılanıb.

Alimlər səfər çərçivəsində Yaponiya, İsrail, Rusiya və digər ölkələrin tanınmış alimləri ilə görüşüb, elmi diskussiyalar aparıblar.

                                                       Əlipənah BAYRAMOV,
“Xalq qəzeti”