Azərbaycan Respublikası Rabitə və İnformasiya Texnologiyaları Nazirliyində (RİTN) ABŞ Prezidentinin elm məsələləri üzrə xüsusi nümayəndəsi xanım Elis Qastın başçılıq etdiyi nümayəndə heyəti ilə görüş olmuşdur. RİTN-in mətbuat xidmətindən bildirmişlər ki, qonaqlara qurumun fəaliyyəti, dövlət proqramları və həyata keçirilən genişmiqyaslı layihələr haqqında məlumat verən nazir Əli Abbasov Azərbaycanın dinamik iqtisadi inkişafı fonunda informasiya-kommunikasiya texnologiyaları (İKT) sektorunda da son illər yüksək nəticələrin əldə olunduğunu qeyd etmişdir. Azərbaycanın təşəbbüsü ilə region üçün də böyük əhəmiyyət kəsb edən "Transavrasiya Super İnformasiya Magistralı" layihəsi barədə danışan nazir 2009-cu ildə BMT-nin xüsusi qətnaməsi ilə yüksək qiymətləndirilən layihəyə Qərb ölkələrinin, həmçinin ABŞ-ın aparıcı İKT şirkətlərinin böyük marağının olduğunu bildirmişdir. Nazir ABŞ-ın "Microsoft", Cisco, HP, İntel şirkətləri ilə sıx əməkdaşlıq əlaqələrinin mövcudluğunu, sözügedən şirkətlərlə region üçün mühüm əhəmiyyət kəsb edən layihələrin həyata keçirildiyini qeyd etmişdir.
ABŞ Prezidentinin elm məsələləri üzrə xüsusi nümayəndəsi xanım Elis Qast Azərbaycanda elmin inkişafında müsbət dəyişikliyin müşahidə olunduğunu bildirərək, azərbaycanlı gənclərin İKT sahəsində təhsillərini ABŞ universitetlərində davam etdirməsinə ölkəsinin yardımçı olacağını, bu sahədə əməkdaşlıq əlaqələrinin dərinləşməsi üçün çalışacağını diqqətə çatdırmışdır. Qonaq elmi nəticələrin iqtisadiyyatda və istehsalatda tətbiqi, innovativ ideyaların həyata keçirilməsi, elmi nəticələr əsasında Azərbaycanda istehsal prosesinə nail olmaq, enerji, informasiya texnologiyaları və nanotexnologiyalar istiqamətlərinə diqqət yetirilməsi üçün lazımi köməyin göstərilməsinə yardımçı olacaqlarını bildirmişdir.
Görüşdə ABŞ-ın Azərbaycandakı səfiri Mətyu Brayzə də iştirak etmişdir.