Samuxun Burunqovaq kənd ümumi orta məktəbi üçün yeni modul tipli məktəb binasının istifadəyə verilməsi ilə bağlı açılış mərasimi keçirilib.

Rayon icra hakimiyyətinin başçısı Alı Qocayev çıxış edərək ölkə rəhbərinin bütün sahələrə olduğu kimi təhsil sahəsinə də göstərdiyi qayğı və diqqətdən söz açıb.

Rayon təhsil şöbəsinin müdiri Gülağa Hüseynov çıxış edərək şagirdlər üçün yaradılmış şəraitə görə ölkə başçısına, təhsil nazirliyinə və icra hakimiyyətinə pedaqoji kollektiv adından öz dərin minnətdarlığını bildirmişdir.

Qeyd edək ki, 80 şagird yerlik, 3 korpusdan ibarət modul tipli məktəbdə 8 sinif otağı, 1 müəllimlər otağı, qarderob, 2 sanitar qovşaq mövcuddur.

Məlumat üçün bildirək ki, Burunqovaq kəndi rayon mərkəzindən 72 kilometr uzaqda, Gürcüstan Respublikası ilə sərhəddə yerləşir.

Hamlet Qasımov,
“Xalq qəzeti”nin bölgə müxbiri