Təhsil Nazirliyi ilə Azərbaycan Milli Antidopinq Agentliyinin təşkilatçılığı ilə Təhsil Nazirliyi sistemində fəaliyyət göstərən idman məktəblərinin rəhbərləri, məşqçi-müəllimləri, həkimləri və idmançıları üçün seminar keçirilib.  

Seminarda iştirak edən təhsil nazirinin müavini Firudin Qurbanov bildirib ki, hazırda  Təhsil Nazirliyi sistemində 76 idman məktəbi fəaliyyət göstərir. Həmin məktəblərdən 3-ü Uşaq-Gənclər İdman Məktəbi, 13-ü İxtisaslaşdırılmış Olimpiya Ehtiyatları Uşaq-Gənclər İdman Məktəbi, 60-ı isə Uşaq-Gənclər İdman-Şahmat Məktəbidir. İdman məktəblərinin idmançıları ölkə və beynəlxalq miqyaslı yarışlarda 2014-cü ildə 1994, 2017-ci ildə isə 2346 medal qazanıblar.

Azərbaycan Milli Antidopinq Agentliyinin direktoru Şəfəq Hüseynli agentlik haqqında məlumat verib, idmanda dopinq vasitələrindən və üsullarından istifadəyə qarşı mübarizədə aidiyyəti təşkilatlarla əməkdaşlıq əlaqələrindən bəhs edib.

Sonra Azərbaycan Milli Antidopinq Agentliyinin əməkdaşları tərəfindən mövzu ilə bağlı təqdimatlar edilib və suallar cavablandırılıb.

                                             Əlipənah BAYRAMOV,
“Xalq qəzeti”