Martın 4-də Azərbaycan Diplomatik Akademiyasının 5 illik yubileyi qeyd edilmişdir. Mərasimdə Akademiyanın rektoru Hafiz Paşayev gənc diplomatların xarici siyasətimizin inkişafında fəal iştirak etdiyini vurğulayaraq təhsil ocağının beşillik fəaliyyəti barədə ətraflı məlumat vermişdir.
H.Paşayev bildirmişdir ki, yarandığı gündən akademiyada xarici siyasət proqramları həyata keçirilir. Bu proqramlara 412 dövlət və qeyri-dövlət strukturlarının nümayəndələri qoşulmuşlar. Bütün proqramlarda dünyanın ən aparıcı "beyin mərkəzləri"nin nümayəndələri, professorlar, alimlər iştirak edirlər. Keçən dövr ərzində beynəlxalq münasibətlər və diplomatiya üzrə magistratura proqramı, eləcə də yay və qış məktəbləri təşkil olunmuşdur.
Cari ildən isə bakalavr pilləsi üzrə qəbul başlayacaqdır. Beş il ərzində akademiyada yerli tələbələrlə yanaşı ABŞ-dan, Avropadan olan tələbələr təhsil alırlar. Mərasimdə akademiyanın 5 illik fəaliyyətini əks etdirən sənədli film göstərilmişdir. Bundan əlavə, mərasimdə bu yaxınlarda dünyasını dəyişmiş, Azərbaycanın Avstriyada səfiri olmuş, diplomat Fuad İsmayılovun xatirəsi də anılmışdır.
Mərhuma həsr edilmiş film nümayiş etdirilmişdir. Azərbaycanın xarici işlər naziri Elmar Məmmədyarov Fuad İsmayılovun ATƏT və digər beynəlxalq təşkilatlarla gördüyü işləri yüksək qiymətləndirmişdir. Digər çıxış edənlər də diplomatla bağlı xatirələrini bölüşmüşlər.