Görkəmli oftalmoloq alim, akademik Zərifə xanım Əliyevanın 15 aprel anım günü və 28 aprel xatirə günü ilə əlaqədar Yeni Azərbaycan Partiyası (YAP) Nəsimi rayon təşkilatının keçirdiyi silsilə tədbirlər davam edir.
Aprelin 27-də YAP Nəsimi rayon təşkilatının qərargahında Azərbaycan Tibb Universitetində (ATU) oftalmologiya ixtisası üzrə təhsil alan yuxarı kurs tələbələrinin iştirakı ilə keçirilən və akademik Zərifə xanım Əliyevanın xatirəsinə həsr edilmiş yazı müsabiqəsinin qalibləri açıqlanmışdır.
Əvvəlcə tədbir iştirakçıları akademik Zərifə xanım Əliyevanın xatirəsini bir dəqiqəlik sükutla yad etmişlər.
YAP Nəsimi rayon təşkilatının sədri, Milli Məclisin deputatı Məlahət İbrahimqızı Zərifə xanım Əliyevanın oftalmologiya elminin inkişafındakı xidmətlərindən söz açmışdır. M.İbrahimqızı demişdir ki, Zərifə xanım Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin tarixinə parlaq səhifələr kimi yazılmışdır.
Səhiyyə nazirinin müavini Elsevər Ağayev və ATU-nun prorektoru Sabir Əliyev qeyd etmişlər ki, Zərifə xanım Əliyeva müstəqil Azərbaycan dövlətinin memarı və qurucusu, bütün mənalı ömrünü Vətəninin və xalqının tərəqqisinə həsr etmiş dahi şəxsiyyətin - ümummilli lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olmuşdur. Vaxtilə böyük şəxsiyyət Əziz Əliyevin ailəsində görüb-götürdükləri yaxşı bir təcrübə kimi bütün ömrü boyu onun köməyinə çatmışdır. Zərifə xanım həmişə ulu öndərimizə mənəvi dayaq, arxa olmuşdur.
Müsabiqənin qalibləri elan edilmiş ATU-nun tələbələri Nərmin Əliyevaya, Güllü İbadovaya və Anar Abdullayevə diplom və oftalmoskop alətləri təqdim edilmişdir.
AzərTAc