Azərbaycan Dövlət Aqrar Universitetində (ADAU) 2017/2018-ci tədris ilinin payız semestrinin imtahan sessiyasında yüksək bilik nümayiş etdirərək müxtəlif fənlərdən 100 bal toplayan tələbələrlə görüş keçirilib.

Kənd Təsərrüfatı Nazirliyindən aldığımız məlumata görə, tədbirdə universitetin rektoru, AMEA-nın müxbir üzvü, professor İbrahim Cəfərov çıxış edərək dövlətin aqrar təhsilə artan qayğısından, təhsil müəssisəsinin maddi-texniki bazasının gücləndirilməsindən, o cümlədən Tələbə evlərinin istifadəyə verilməsinin təhsilin keyfiyyətinə müsbət təsirindən söhbət açıb.

Görüşdə imtahan sessiyasında yüksək bilik nümayiş etdirərək müxtəlif fənlərdən 100 bal toplamış əyani təhsil formasının tələbələrinin stimullaşdırılması məqsədilə büdcədənkənar vəsait hesabına  2018-ci il martın 1-dən iyulun 5-dək  təqaüdələrinə 6 fənn üzrə 100 manat, 5 fənn üzrə 70 manat, 4 fənn üzrə 50 manat əlavələr ediləcəyi elan olunub.

Əlipənah BAYRAMOV,
“Xalq qəzeti”