Azərbaycanın 2018-ci il üçün təsdiq olunmuş dövlət büdcəsinə əsasən, bu il Sahibkarlığa Kömək Milli Fondu (SKMF) xətti ilə 170 milyon manat dəyərində güzəştli kreditlərin ayrılması planlaşdırılır.

İqtisadiyyat Nazirliyinin mətbuat xidmətinin fondun sədri Şirzad Abdullayevin sözlərinə istinadən yaydığı məlumatda bildirilir ki, qurum bu il maliyyələşdirilmənin həcmini, eyni zamanda, 200 milyon manatadək artıra bilər. Bu məsələdə hər şey banklar və sahibkarlar arasında razılaşmalardan asılıdır.

Qeyd edək ki, SKMF 1992-ci ildə yaradılıb.Sahibkarlara kreditlərin verilməsi müvəkkil banklar və bank olmayan kredit təşkilatları vasitəsi ilə həyata keçirilir. 2017-ci ildən başlayaraq SKMF güzəştli kreditləşdirilməni yalnız qaytarılmış vəsaitlər hesabına ayırır.

1992-2017-ci illər ərzində sahibkarlara SKMF xətti ilə ümumi dəyəri 4,5 milyard manat təşkil edən layihələrin həyata keçirilməsi məqsədi ilə 2,1 milyard manat məbləğində güzəştli kreditlər verilib. Kreditlər 34 600 sahibkara təqdim olunub.

V.BAYRAMOV,
“Xalq qəzeti”