Milli Məclis "Xəzər dənizinin Azərbaycan sektorunda "Bahar" yatağının və "Qum-Dəniz" yatağının daxil olduğu blokun kəşfiyyatı, bərpası, işlənməsi və hasilatın pay bölgüsü haqqında Dövlət Neft Şirkəti, "Bahar Enerji Limited" və Dövlət Neft Şirkətinin Ortaq Neft Şirkəti arasında Sazişin qəbul və təsdiq edilməsi, həyata keçirilməsinə icazə verilməsi barədə" qanun qəbul etmişdir.
Milli Məclis sədrinin müavini, parlamentin təbii ehtiyatlar, energetika və ekologiya komitəsinin sədri Valeh Ələsgərov bildirmişdir ki, saziş Prezident İlham Əliyevin müvafiq sərəncamına uyğun olaraq ötən il dekabrın 22-də imzalanmışdır.
Sənəddə hasilatın pay bölgüsü, işçi qüvvələrinin nisbəti, sərmayə qoyuluşu ilə bağlı müddəalar və digər şərtlər öz əksini tapmışdır. Layihənin həyata keçiriləcəyi ilk 5 il müddətində bu sahədə çalışacaq mühəndis-texniki işçilərin 70 faizi, fəhlələrin 90 faizi, 5 ildən sonra isə mühəndis-texniki işçilərin 90, fəhlələrin isə 95 faizi Azərbaycan vətəndaşları olacaqlar. Sazişə görə həmin yataqdan əldə olunacaq gəlirlər də olduqca səmərəli bölüşdürüləcəkdir.
Müzakirələr zamanı çıxış edən deputatlar sənədin Azərbaycanın maraqlarına uyğun və yataqdakı risklər nəzərə alınmaqla yüksək səviyyədə hazırlandığını vurğulamışlar.
AzərTAc{nl}