İqtisadiyyat Nazirliyinin Sahibkarlığa Kömək Milli Fondunun icraçı direktorunun müavini Arif Vəliməmmədov Qax rayonunda keçirilən forumda fondun özəl bölmənin inkişafında, xüsusilə regionlarda sahibkarlıq fəaliyyətinin genişləndirilməsi istiqamətində həyata keçirdiyi tədbirlər barədə məlumat verib. O deyib ki, bu ilin ötən dövrü ərzində Fondun vəsaitləri hesabına investisiya layihələrinin maliyyələşdirilməsinə 19 milyon manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 1000-dən çox yeni iş yerinin yaradılmasına imkan verib. Qeyd edilib ki, Qax rayonunda balın emalı və sənaye üsulu ilə qablaşdırılması üzrə müasir müəssisənin yaradılması planlaşdırılır. Bu müəssisədə emal olunan bal “Made in Azerbaijan” brendi ilə xarici bazara çıxarılacaq. Ümumilikdə, arıçılığın inkişafı ilə bağlı indiyədək 430-dək sahibkara 4,7 milyon manat güzəştli kredit verilib.

Tədbir çərçivəsində dövlətin güzəştli krediti ayrılan aqroparkda aparılan işlərə baxış keçirilib.

Vaqif BAYRAMOV,

“Xalq qəzeti”