Cari ilin iyul ayında fəaliyyətə başlayacağı nəzərdə tutulan Sabirabad Sənaye Məhəlləsində bütün zəruri infrastruktur dövlət vəsaiti hesabına yaradılır. İqtisadiyyat Nazirliyinin mətbuat xidmətinin məlumatında bildirilir ki, bu sənaye məhəlləsində regionun iqtisadi potensialına uyğun olaraq, yun tədarükü, pambıqtəmizləmə, plastik məmulatlar və tikinti materiallarının istehsalı, kənd təsərrüfatı məhsullarının emalı müəssisələri və logistik mərkəz yaradılacaq.

Sabirabad Sənaye Məhəlləsində ilkin mərhələdə yüksək standartlara cavab verən ümumi sahəsi 7605 kvadratmetr olan 3 istehsal sahəsi, 1060 kvadratmetr sahəsi olan ikimərtəbəli inzibati bina, eləcə də texniki və köməkçi binalar tikilərək sahibkarların istifadəsinə veriləcək.

Hazırda sənaye məhəlləsinin müvafiq infrastrukturla təmin edilməsi və burada fəaliyyət göstərəcək sahibkarlıq subyektlərinin istehsal prosesi zamanı tələb olunan elektrik enerjisi, su xətti, qaz və fiber-optik kabelinin çəkilişi ilə bağlı müvafiq tədbirlər görülür.

Əlipənah BAYRAMOV,

“Xalq qəzeti”