Azərbaycanda yeni istehsal və emal müəssisələrinin yaradılması və mövcud istehsal sahələrinin potensialının artırılması və genişləndirilməsi, yerli istehsal hesabına özünütəminetmə səviyyəsinin yüksəldilməsi dövlət başçımızın  daim diqqət mərkəzindədir.

İqtisadiyyat Nazirliyinin yaydığı məlumatda deyilir ki, hazırda “Azərxalça” ASC-nin istehsal sahələrinin sayının artırılması işləri davam etdirilir. 10 rayonda xalça müəssisələrinin tikintisi artıq yekunlaşıb, daha 10 müəssisənin, 5 yun və boyaq maddələri məntəqələrinin tikintisi isə davam etdirilir. Yunəyrici Boyaq fabrikinin tikintisinə başlanılması da xalçaçılığın xammal bazasının yaradılmasına töhfə verəcək.

Prezident İlham Əliyevin yeni həyat bəxş etdiyi Cəbrayıl rayonunun Cocuq Mərcanlı kəndində Azərbaycan hökuməti və ABŞ tərəfindən birgə həyata keçirilən Yem Emalı Müəssisəsinin tikintisi başa çatdırılıb və fermerlərin istifadəsinə verilib. Türk iş adamları tərəfindən Cocuq Mərcanlıda kənd təsərrüfatı sahəsində birgə layihənin reallaşdırılması işlərinə başlanılıb.

Vaqif BAYRAMOV,

 “Xalq qəzeti”