İqtisadiyyat Nazirliyinin yaydığı məlumatda bildirilir ki, bu il Azərbaycanda  15 aqropark istifadəyə veriləcək.

Dövlət başçısının tapşırığına uyğun olaraq, hazırda ölkənin 28 rayonu üzrə qeyri-səmərəli və istifadəsiz kənd təsərrüfatı təyinatlı torpaqlarda, 183 min hektar ərazidə 43 aqroparkın yaradılması prosesi sürətlə aparılır. Aqroparkların yaradılmasına 251 milyon manat, o cümlədən infrastruktur təminatına 149 milyon manat dövlət investisiyası və 102 milyon manat güzəştli kredit ayrılıb, 11 aqropark üzrə 350 milyon manat dəyərində dövlət investisiya təşviqi sənədi verilib, kompleks aqrolizinq xidmətləri göstərilib.

İqtisadiyyat Nazirliyinin məlumatında, eyni zamanda, xatırladılır ki, artıq aqroparkların 3-də birinci mərhələ başa çatdırılıb, 25-də tikinti-quraşdırma və 15-də layihələndirmə işləri aparılır.

Aqroparkların yaradılması ərzaq təhlükəsizliyinin möhkəmləndirilməsinə, emal sənayesinin davamlı olaraq yüksək keyfiyyətli və maya dəyəri aşağı olan xammalla təminatına, yerli məhsulların rəqabətqabiliyyətliliyinin daha da artmasına müsbət təsir göstərəcək.

V. BAYRAMOV,

“Xalq qəzeti”