Azərbaycanın rabitə və informasiya texnologiyaları naziri Əli Abbasov aprelin 27-də Çin Xalq Respublikasına səfər edəcəkdir.
Nazirlikdən bildirmişlər ki, səfərin əsas məqsədi Trans-Avrasiya Super İnformasiya Magistralı (TASİM) layihəsinə həsr olunmuş təqdimat və forumda, eyni zamanda Şanxay şəhərində keçiriləcək "China Expo-2010" sərgisində iştirakdır.
Azərbaycan nüfuzlu "China Expo-2010" sərgi və forumunda ölkəmizdəki sosial-iqtisadi inkişafı təcəssüm etdirən pavilyonla təmsil olunacaqdır.
Səfər çərçivəsində Ə.Abbasov Çinin sənaye və informasiya texnologiyaları naziri, eləcə də "Huawei" və "China Telecom Corparation Limited" şirkətləri idarə heyətlərinin sədrləri ilə ikitərəfli görüşlər keçirəcəkdir.
Azərbaycanın təşəbbüsü ilə reallaşması nəzərdə tutulan TASİM layihəsinin BMT Baş Məclisinin 64-cü sessiyasında qəbulundan sonra Çin hökuməti bu layihənin reallaşmasına böyük maraq göstərmiş və irimiqyaslı sərmayə qoyuluşu ilə bağlı təklif irəli sürmüşdür.