2011-ci ilin perspektivləri ümidvericidir.Bunu Beynəlxalq Valyuta Fondunun Azərbaycan üzrə rəhbəri Nadim İlahi fevralın 15-də keçirdiyi mətbuat konfransında bildirmişdir.
N.İlahi 2011-ci ildə iqtisadiyyatın yüksəlməsini göstərən əlamətlərin pul-kredit siyasətini şərtləndirməsini tələb etdiyini demişdir. Qeyd etmişdir ki, bu yaxınlarda Mərkəzi Bankın intervensiya dərəcəsinin yüksəldilməsi və daha çevik məzənnə siyasətinə keçid düzgün tədbirlərdir. Bu addımlara paralel olaraq iqtisadi siyasət tədbirləri daha sıx əlaqələndirilməli, inflyasiya hədəfinin təyin edilməsi sisteminə keçilməli, habelə bank sisteminin məzənnə risklərinin öhdəsindən gəlmə bacarığı yaxşılaşdırılmalıdır. Bu il Azərbaycanda ÜDM-in 2,8, o cümlədən qeyri-neft sektorunda artımın 6 faiz olacağı proqnozlaşdırılır. Qeyri-neft sektorundakı artım daha çox tikinti, ticarət və xidmət sahələrində özünü büruzə verəcəkdir. Əsas narahatlıq hədəfi inflyasiyadır. Bunun da səbəbi qlobal ərzaq bahalaşmasıdır. BVF qabaqlayıcı tədbir kimi büdcə xərclərini məhdudlaşdırmağı tövsiyə etmişdir. N.İlahi BVF-nin ölkə rəhbərliyi tərəfindən aparılan antikorrupsiya və antiinhisarçılıq tədbirlərini alqışladığını da vurğulamışdır.