Mərkəzi Bankın sədri Elman Rüstəmov Beynəlxalq Valyuta Fondunun (BVF) Azərbaycan üzrə missiyasının yeni təyin olunmuş rəhbəri Nadim İlahinin rəhbərlik etdiyi nümayəndə heyəti ilə görüşmüşdür.
Görüş zamanı Azərbaycanda 2010-cu ilin iqtisadi yekunları və 2011-ci ilin prioritetləri, o cümlədən makroiqtisadi vəziyyət və bank sektorunun mövcud durumu, Mərkəzi Bankın məzənnə siyasəti strategiyası müzakirə olunmuşdur.
N.İlahi 2010-cu ildə Azərbaycanın müşahidə olunan iqtisadi artım, makroiqtisadi və maliyyə sabitliyinin qorunmasında Mərkəzi Bankın rolu ilə yanaşı ölkə iqtisadiyyatının diversifikasiyası məsələsinə də toxunmuşdur. Görüşdə BVF-nin Maddələr Sazişinin IV məsləhətləşmələr bəndi üzrə gözlənilən missiyası ilə bağlı fikir mübadiləsi aparıldı.
E.Rüstəmov 2010-cu ildə bank sektorunun inkişafı, Mərkəzi Bankın məzənnə siyasətinin orta və uzunmüddətli strategiyası, eləcə də maliyyə sabitliyinin gücləndirilməsi üçün görülmüş makroprudensial və nəzarət tədbirləri barədə ətraflı məlumat vermişdir.
Görüşdə banklarda risk menecmentinin təkmilləşdirilməsi, bank sistemində konsolidasiya ətrafında da fikir mübadiləsi aparılmışdır.

AzərTAc