Azərbaycanda səfərdə olan Fransa-Azərbaycan işçi qrupunun üzvləri fevralın 7-də Milli Məclisin sədri Oqtay Əsədovla görüşmüşlər.
O.Əsədov Azərbaycan ilə Fransa arasındakı əlaqələrdən danışmışdır. Bildirmişdir ki, rəsmi Bakı münasibətlərimizin daha da genişlənməsində maraqlıdır. Azərbaycan Prezidenti İlham Əliyevin dövlət başçısı kimi ilk xarici səfərini Fransaya etməsi bunun bariz nümunəsidir.
Dünyanı bürüyən qlobal maliyyə böhranına baxmayaq iqtisadi-ticarət dövriyyəmiz də xeyli artmışdır. Ticarət dövriyyəmiz 2 milyard avroya çatmışdır. Ölkələrimiz arasında 30-dan çox saziş və digər sənədlər imzalanmışdır. Fransanın nüfuzlu şirkətləri və iş adamları Azərbaycan iqtisadiyyatının müxtəlif sahələrinə sərmayə qoyurlar. Ticarət dövriyyəsini artırmaq və əməkdaşlığımızı daha da genişləndirmək üçün hüquqi baza və geniş imkanlar vardır.
Parlamentlərarası əlaqələrimiz də uğurla inkişaf edir. Hər iki ölkənin parlamentində dostluq qrupları fəaliyyət göstərir. Deputatlarımızın qarşılıqlı səfərləri, keçirdikləri görüşlər bu əlaqələri daha da genişləndirir və möhkəmləndirir.
Milli Məclisin sədri Ermənistan-Azərbaycan, Dağlıq Qarabağ münaqişəsi ilə bağlı söylədiyi fikirlərə və Azərbaycanın haqq səsini daim müdafiə etdiyinə görə qonaqlara minnətdarlıq etmişdir.
Fransa Senatının üzvü, işçi qrupun rəhbəri Natali Qule demişdir ki, Azərbaycana səfərdən məqsəd ölkəmiz haqqında daha geniş məlumat əldə etmək və əlaqələrimizi genişləndirməkdir. Xanım senator münasibətlərimizin hərtərəfli inkişafı üçün səylərini artıracaqlarını bildirmişdir.