Fevralın 2-də Vaşinqtonda yerləşən ABŞ-Azərbaycan Ticarət Palatası Birləşmiş Ştatların iş adamları üçün Azərbaycanda sərmayə və biznes imkanlarına dair seminar təşkil etmişdir. "2011-ci ildə Azərbaycanda sərmayə qoyuluşu - neft geniş artıma təkan kimi" devizi altında keçirilən seminarda Birləşmiş Ştatların EXİM Bankının iqtisadi inkişaf üzrə nümayəndəsi Brayan Sant Ancelo, nüfuzlu "Baker&McKenzie" beynəlxalq hüquq firmasının Bakı üzrə təmsilçisi Daniel Mətyus və Azərbaycanın ABŞ-dakı səfirliyinin iqtisadi məsələlər üzrə müşaviri Nərgiz Qurbanova iştirakçıları ölkəmizin artan investisiya imkanları barədə məlumatlandırmışlar.
Nərgiz Qurbanova Azərbaycanın makroiqtisadi göstəriciləri, beynəlxalq inkişaf üzrə təşkilatların Azərbaycandakı iqtisadi vəziyyətlə bağlı rəyləri, eləcə də Azərbaycan hökumətinin ölkədə sərmayə qoyuluşuna dair ən son siyasəti barədə danışmışdır. Diplomat qeyri-neft sektorunda kənd təsərrüfatı, informasiya-kommunikasiya texnologiyaları, turizm sahələrinin aparıcı rol oynadığını qeyd etmiş, ölkədə xarici iş adamları üçün yaradılan geniş imkanlar və cəlbedici investisiya mühitinin olduğunu vurğulamışdır. Azərbaycana ildə bir milyona yaxın turist gəldiyini diqqətə çatdıran müşavir marağı olan iş adamlarını bu ilin aprelində ölkəmizdə keçiriləcək Beynəlxalq səyahət və turizm sərgisinə dəvət etmişdir.
"Baker&McKenzie" beynəlxalq hüquq firmasının təmsilçisi Daniel Mətyus neft və qaz ehtiyatlarının gələcəkdə də Azərbaycan iqtisadiyyatının aparıcı qolu olacağını diqqətə çatdırmışdır. Demişdir ki, bu yaxınlarda kəşf edilən yeni "Ümid" qaz yatağı ölkənin gələcəyinə daha inamla baxmağa əsas verir. D.Mətyus iqtisadiyyatda qeyri-neft sektorunun son iki ildə nəzərəçarpacaq dərəcədə genişləndiyini bildirərək Azərbaycanda həyata keçirilən regional əhəmiyyətli layihələr, xüsusi iqtisadi zonaların yaradılmasının xarici sərmayəçilərə yeni ideya və imkanlar verdiyini qeyd etmişdir. Bununla yanaşı o, neft və qaz sahəsinin intensiv şəkildə genişlənməsi ilə əlaqədar enerji sektoru ilə bağlı sahələrin də davamlı sərmayəyə ehtiyac duyduğunu diqqətə çatdırmışdır. Belə ki, dizayn, mühəndislik, tikinti, təchizat sahələri də əlverişli biznes imkanları təklif edərək sərmayəçiləri gözləyir.
ABŞ malları və xidmətlərini dəstəkləyən "Eksport-İmport" Bankının iqtisadi inkişaf üzrə nümayəndəsi Brayan Sant Ancelo çıxışında Azərbaycanın ətraf mühitin qorunması sahəsində böyük işlər gördüyünü demişdir. Bildirmişdir ki, bankın indiyədək Azərbaycanda dəstəklədiyi və maliyyələşdirdiyi layihələrin əksəriyyəti məhz qeyri-neft sektoruna - infrastruktur və ətraf mühitin qorunması sahələrinə aid olmuşdur. Ölkəmizdə əlverişli sərmayə qoyuluşu şərtləri və şəraitinin olduğunu təsdiqləyən bankın nümayəndəsi Amerika iş adamlarını əmin etmişdir ki, belə layihələrə dəstək göstəriləcəkdir.
Seminardan sonra Sant Ancelo bildirmişdir ki, EXİM Bank Azərbaycanda şahidi olduğu dinamik artımdan ruhlanmışdır. S.Ancelo qeyd etmişdir ki, bankın ekspertlər şurasının Azərbaycanda peyk quruluşu və yeni təyyarələrin alınması üçün kredit xətti ayırmaq barədə qərarları da məhz ölkənin maliyyə durumuna inamdan irəli gəlir. O demişdir: "Biz iş adamlarının infrastruktur, ətraf mühitin qorunması, kənd təsərrüfatı kimi qeyri-neft sektoru sahələrində Azərbaycanda geniş imkanların olduğunu bilməsini istərdik. ABŞ iş adamları hökumətinizin bunun üçün yaratdığı əlverişli şəraitdən bəhrələnə bilərlər".

Şəfəq AKİFQIZI, AzərTAc-ın xüsusi müxbiri
Vaşinqton