Azərbaycan Respublikası Dövlət Neft Şirkətinin mətbuat xidmətindən bildirmişlər ki, yanvarın 29-da Qəbələ rayonunun Vəndam kəndinə ilk dəfə olaraq təbii qaz verilmişdir.
Bu münasibətlə keçirilən tədbirdə Milli Məclisin deputatı Fəttah Heydərov, "Azəriqaz" İstehsalat Birliyinin baş direktoru Əkbər Hacıyev, Qəbələ Rayon İcra Hakimiyyətinin başçısı Səbuhi Abdullayev, ictimaiyyət nümayəndələri iştirak etmişlər. Bildirilmişdir ki, Vəndam kəndinin qazlaşdırılması məqsədi ilə ilkin mərhələdə 16 min metr uzunluğunda küçə xətləri inşa edilmiş, 120 evdə sayğac quraşdırılmışdır. Növbəti aylarda kəndin qazlaşdırılması proqramının ikinci mərhələsi başa çatdırılacaq və bununla da Vəndamın bütün sakinləri təbii qazla təmin olunacaqdır. Qeyd olunmuşdur ki, "Azəriqaz" İB tərəfindən Qəbələ rayonunda Vəndam-Nohurqışlaq kəndləri istiqamətində 12 min metr uzunluğunda daşıyıcı qaz kəməri çəkilmişdir. Bu, daha 8 kəndin qazlaşdırılmasını təmin edəcəkdir. Bum-Qəmərvan kəndləri istiqamətində 2 min metr, Nic və ətrafdakı digər kəndlərə ümumilikdə 1800 metr magistral qaz kəməri çəkilmiş, təbii qazdan qeyri-qanuni istifadə hallarının qarşısını almaq məqsədi ilə qaz sayğacları küçə və binaların giriş hissəsində quraşdırılmışdır.
Tədbirdə çıxış edən kənd ağsaqqalları, ziyalılar, şəhid ailələrinin üzvləri onlara göstərilən diqqət və qayğıya görə Prezident İlham Əliyevə minnətdarlıqlarını bildirmişlər.

AzərTAc